duniya-e-husn-o-ishq mein kis ka zuhur tha

duniyā-e-husn-o-ishq meñ kis kā zuhūr thā

har aañkh barq-pāsh thī har zarra tuur thā

merī nazar kī aaḌ meñ un kā zuhūr thā

allāh un ke nuur kā parda bhī nuur thā

thī har taḌap sukūn kī duniyā liye hue

pahlū meñ aap the ki dil-e-nā-subūr thā

ham kushtagān-e-ġham pe ye ilzām-e-zindagī

be-mehr kuchh to pās-e-haqīqat zarūr thā

bālīñ pe tum jab aa.e to aa.ī vo maut bhī

jis maut ke liye mujhe jiinā zarūr thā

thī un ke rū-ba-rū bhī vahī shān-e-iztirāb

dil ko bhī apnī vaz.a pe kitnā ġhurūr thā

lutf-e-hayāt be-ḳhalish-e-mudda.ā kahāñ

yaanī ba-qadr-e-talḳhi-e-sahbā surūr thā

uTh kar chale to hashr bhī uThnā thā kyā zarūr

un kī galī se madfan-e-'fānī' to duur thā

duniya-e-husn-o-ishq mein kis ka zuhur tha

har aankh barq-pash thi har zarra tur tha

meri nazar ki aaD mein un ka zuhur tha

allah un ke nur ka parda bhi nur tha

thi har taDap sukun ki duniya liye hue

pahlu mein aap the ki dil-e-na-subur tha

hum kushtagan-e-gham pe ye ilzam-e-zindagi

be-mehr kuchh to pas-e-haqiqat zarur tha

baalin pe tum jab aae to aai wo maut bhi

jis maut ke liye mujhe jina zarur tha

thi un ke ru-ba-ru bhi wahi shan-e-iztirab

dil ko bhi apni waza pe kitna ghurur tha

lutf-e-hayat be-KHalish-e-muddaa kahan

yani ba-qadr-e-talKHi-e-sahba surur tha

uTh kar chale to hashr bhi uThna tha kya zarur

un ki gali se madfan-e-'fani' to dur tha