duniya ki riwayat se begana nahin hun

duniyā kī rivāyāt se begāna nahīñ huuñ

chheḌo na mujhe maiñ koī dīvāna nahīñ huuñ

is kasrat-e-ġham par bhī mujhe hasrat-e-ġham hai

jo bhar ke chhalak jaa.e vo paimāna nahīñ huuñ

rūdād-e-ġham-e-ishq hai taaza mire dam se

unvān-e-har-afasānā huuñ afsāna nahīñ huuñ

ilzām-e-junūñ deñ na mujhe ahl-e-mohabbat

maiñ ḳhud ye samajhtā huuñ ki dīvāna nahīñ huuñ

maiñ qā.el-e-ḳhuddārī-e-ulfat sahī lekin

ādāb-e-mohabbat se to begāna nahīñ huuñ

hai barq-e-sar-e-tūr se dil shola-ba-dāmāñ

sham-e-sar-e-mahfil huuñ maiñ parvāna nahīñ huuñ

hai gardish-e-sāġhar mirī taqdīr kā chakkar

mohtāj-e-tavāf-e-dar-e-mai-ḳhāna nahīñ huuñ

kāñToñ se guzar jaatā huuñ dāman ko bachā kar

phūloñ kī siyāsat se maiñ begāna nahīñ huuñ

lazzat-kash-e-nazzāra 'shakīl' apnī nazar hai

mahrūm-e-jamāl-e-ruḳh-e-jānāna nahīñ huuñ

duniya ki riwayat se begana nahin hun

chheDo na mujhe main koi diwana nahin hun

is kasrat-e-gham par bhi mujhe hasrat-e-gham hai

jo bhar ke chhalak jae wo paimana nahin hun

rudad-e-gham-e-ishq hai taza mere dam se

unwan-e-har-afasana hun afsana nahin hun

ilzam-e-junun den na mujhe ahl-e-mohabbat

main KHud ye samajhta hun ki diwana nahin hun

main qael-e-KHuddari-e-ulfat sahi lekin

aadab-e-mohabbat se to begana nahin hun

hai barq-e-sar-e-tur se dil shola-ba-daman

sham-e-sar-e-mahfil hun main parwana nahin hun

hai gardish-e-saghar meri taqdir ka chakkar

mohtaj-e-tawaf-e-dar-e-mai-KHana nahin hun

kanTon se guzar jata hun daman ko bacha kar

phulon ki siyasat se main begana nahin hun

lazzat-kash-e-nazzara 'shakil' apni nazar hai

mahrum-e-jamal-e-ruKH-e-jaanana nahin hun