duniya ko jab nazdiki se dekha hai

duniyā ko jab nazdīkī se dekhā hai

tab samjhā ye sab kuchh khel-tamāsha hai

hāthoñ kī do-chār lakīreñ paḌh kar vo

mujh se bolā aage sab kuchh achchhā hai

us se bas ik baar milā par hairāñ huuñ

dil meñ tab se ghar kar ke vo baiThā hai

kāġhaz par dil kī tasvīr banā.ī jab

us ne pūchhā ye kis shai kā naqsha hai

soch rahā huuñ maiñ is kā saudā kar duuñ

us kī yādoñ kā jo dil meñ malba hai

donoñ pahlū meñ hī haar chhipī is meñ

mere hāthoñ meñ ab ye jo sikka hai

is ḳhātir maiñ roz mashaqqat kartā huuñ

āsānī se kyā hāsil ho paatā hai

jab qudrat ne thoḌā aaj navāzā to

saare mujh se pūchhe haiñ tū kaisā hai

'mīt' yahāñ apne to naam ke apne haiñ

an-jānoñ se rishta dil kā gahrā hai

duniya ko jab nazdiki se dekha hai

tab samjha ye sab kuchh khel-tamasha hai

hathon ki do-chaar lakiren paDh kar wo

mujh se bola aage sab kuchh achchha hai

us se bas ek bar mila par hairan hun

dil mein tab se ghar kar ke wo baiTha hai

kaghaz par dil ki taswir banai jab

us ne puchha ye kis shai ka naqsha hai

soch raha hun main is ka sauda kar dun

us ki yaadon ka jo dil mein malba hai

donon pahlu mein hi haar chhipi is mein

mere hathon mein ab ye jo sikka hai

is KHatir main roz mashaqqat karta hun

aasani se kya hasil ho pata hai

jab qudrat ne thoDa aaj nawaza to

sare mujh se puchhe hain tu kaisa hai

'mit' yahan apne to nam ke apne hain

an-jaanon se rishta dil ka gahra hai