duniya mein har qadam pe hamein tirgi mili

duniyā meñ har qadam pe hameñ tīrgī milī

dekhā jo apne dil kī taraf raushnī milī

ulfat milī ḳhulūs milā dostī milī

har dil meñ ham ko apnī hī tasvīr sī milī

nāgāh jaise bichhḌā huā ham-safar mile

ġham mil gayā to dil ko baḌī tāzgī milī

shāyad mirī talāsh kā maqsad hī thā ġhalat

āvāz dī ḳhirad ko to dīvāngī milī

hai apnī zindagī kī ye tafsīr-e-muḳhtasar

ġham mustaqil milā to ḳhushī ārizī milī

jo ho chalā thā dil ko sukūñ un ke hijr meñ

vo mil ga.e to phir use vāraftagī milī

ishrat-kada hai dahr magar shaiḳh ke liye

ham ko to ik ghaḌī bhī na ārām kī milī

vo aur hoñge pī ke jo sarshār ho ga.e

har jaam se hameñ to na.ī tishnagī milī

jāgīr apnī shā.erī pahle se thī magar

ik umr jab riyāz kiyā sāhirī milī

duniya mein har qadam pe hamein tirgi mili

dekha jo apne dil ki taraf raushni mili

ulfat mili KHulus mila dosti mili

har dil mein hum ko apni hi taswir si mili

nagah jaise bichhDa hua ham-safar mile

gham mil gaya to dil ko baDi tazgi mili

shayad meri talash ka maqsad hi tha ghalat

aawaz di KHirad ko to diwangi mili

hai apni zindagi ki ye tafsir-e-muKHtasar

gham mustaqil mila to KHushi aarizi mili

jo ho chala tha dil ko sukun un ke hijr mein

wo mil gae to phir use waraftagi mili

ishrat-kada hai dahr magar shaiKH ke liye

hum ko to ek ghaDi bhi na aaram ki mili

wo aur honge pi ke jo sarshaar ho gae

har jam se hamein to nai tishnagi mili

jagir apni shaeri pahle se thi magar

ek umr jab riyaz kiya sahiri mili