duniya mein koi waqt bhi yaksan kahan raha

duniyā meñ koī vaqt bhī yaksāñ kahāñ rahā

ranjūr kar gayā to kabhī shādmāñ rahā

sūraj ke chaḌhne Dhalne se saa.e badal ga.e

apnī jagah na dahr meñ koī nishāñ rahā

shah-zor kal thā aaj vo kamzor ho gayā

aur bebasī meñ mā.il-e-āh-o-fuġhāñ rahā

tāqat kahīñ atā hai kahīñ musta.ār hai

rustam jo thā jahāñ meñ kabhī nā-tavāñ rahā

ho jaa.e sard ātish-e-namrūd aaj bhī

lekin ḳhalīl sā yahāñ īmāñ kahāñ rahā

bātil se ma.arka rahā roz-e-azal hī se

har-gām ḳhair-o-shar kā ajab imtihāñ rahā

do gaz zamīñ hai bil-yaqīñ tere nasīb meñ

pahuñchā ho chāñd par yā sar-e-āsmāñ rahā

duniyā ne kab kisī kā diyā saath umr bhar

insān kab kisī pe sadā mehrbāñ rahā

mar.ūb us ko bātil-o-zulmat na kar sake

īmāñ se qalb-e-'faiz' yahāñ zau-fishāñ rahā

duniya mein koi waqt bhi yaksan kahan raha

ranjur kar gaya to kabhi shadman raha

suraj ke chaDhne Dhalne se sae badal gae

apni jagah na dahr mein koi nishan raha

shah-zor kal tha aaj wo kamzor ho gaya

aur bebasi mein mail-e-ah-o-fughan raha

taqat kahin ata hai kahin mustaar hai

rustam jo tha jahan mein kabhi na-tawan raha

ho jae sard aatish-e-namrud aaj bhi

lekin KHalil sa yahan iman kahan raha

baatil se marka raha roz-e-azal hi se

har-gam KHair-o-shar ka ajab imtihan raha

do gaz zamin hai bil-yaqin tere nasib mein

pahuncha ho chand par ya sar-e-asman raha

duniya ne kab kisi ka diya sath umr bhar

insan kab kisi pe sada mehrban raha

marub us ko baatil-o-zulmat na kar sake

iman se qalb-e-'faiz' yahan zau-fishan raha