duniya ne sada samjha diwane ko farzana

duniyā ne sadā samjhā dīvāne ko farzāna

farzāna haqīqat meñ thā sab meñ jo dīvāna

ik qatre se 'ālam meñ tūfān bapā kar de

ik jur'e se paidā kar mai-ḳhāne kā mai-ḳhāna

tū 'ālam-e-hastī meñ jūyā-e-sukūñ kyoñ hai

ik shorish-e-paiham ho ai himmat-e-mardāna

rindoñ ko pilā saaqī sahbā-e-junūñ-parvar

vo mai-kada-barham-kun har laġhzish-e-mastāna

ātish hai nihāñ tujh meñ phir sham' kī kyā hājat

ḳhud sho'la-e-tābāñ ban ai sozish-e-parvāna

saaqī ke taġhāful se māyūs na ho rindo

ḳhud tālib-e-gardish hai ab fitrat-e-paimāna

har but kī tajallī meñ tū ḳhud hī daraḳhshāñ hai

tū apnā pujārī hai ai sāne'-e-but-ḳhāna

kām-e-dil-o-jāñ paanā dushvār sahī 'tālib'

mumkin hai agar tujh meñ ho jur.at-e-rindāna

duniya ne sada samjha diwane ko farzana

farzana haqiqat mein tha sab mein jo diwana

ek qatre se 'alam mein tufan bapa kar de

ek jur'e se paida kar mai-KHane ka mai-KHana

tu 'alam-e-hasti mein juya-e-sukun kyon hai

ek shorish-e-paiham ho ai himmat-e-mardana

rindon ko pila saqi sahba-e-junun-parwar

wo mai-kada-barham-kun har laghzish-e-mastana

aatish hai nihan tujh mein phir sham' ki kya hajat

KHud sho'la-e-taban ban ai sozish-e-parwana

saqi ke taghaful se mayus na ho rindo

KHud talib-e-gardish hai ab fitrat-e-paimana

har but ki tajalli mein tu KHud hi daraKHshan hai

tu apna pujari hai ai sane'-e-but-KHana

kaam-e-dil-o-jaan pana dushwar sahi 'talib'

mumkin hai agar tujh mein ho jurat-e-rindana