duniya samajh rahi hai ki patthar uchhaal aae

duniyā samajh rahī hai ki patthar uchhāl aa.e

ham apnī pyaas jā ke samundar meñ Daal aa.e

jo phāñs chubh rahī hai diloñ meñ vo tū nikāl

jo paañv meñ chubhī thī use ham nikāl aa.e

kuchh is tarah se zikr-e-tabāhī sunā.iye

āñkhoñ meñ ḳhuun aa.e na shīshe meñ baal aa.e

samjho ki zindagī kī vahīñ shaam ho ga.ī

kirdār bechne kā jahāñ bhī savāl aa.e

guzro dayār-e-fikr se 'mansūr' is tarah

ḳhud par zavāl aa.e na fan par zavāl aa.e

duniya samajh rahi hai ki patthar uchhaal aae

hum apni pyas ja ke samundar mein Dal aae

jo phans chubh rahi hai dilon mein wo tu nikal

jo panw mein chubhi thi use hum nikal aae

kuchh is tarah se zikr-e-tabahi sunaiye

aankhon mein KHun aae na shishe mein baal aae

samjho ki zindagi ki wahin sham ho gai

kirdar bechne ka jahan bhi sawal aae

guzro dayar-e-fikr se 'mansur' is tarah

KHud par zawal aae na fan par zawal aae