dushwari-e-hayat ko aasan na kar sake

dushvārī-e-hayāt ko āsāñ na kar sake

ham apne dard kā koī darmāñ na kar sake

tauhīn ham ne apnī gavārā na kī kabhī

izzat ko apnī hirs pe qurbāñ na kar sake

ham ne to apne aap ko ḳhud hī Dubo diyā

tūfāñ hameñ Dubone kā ehsāñ na kar sake

ishq-e-butāñ meñ haal se behāl ho ga.e

ham phir bhī kuchh najāt kā sāmāñ na kar sake

marne ke baa'd qabr kā merī nishāñ na ho

koī rafīq us pe charāġhāñ na kar sake

āshiq haqīqatan vahī hotā hai jis kā dil

taḌpe magar visāl kā armāñ na kar sake

be-kār kar diyā hai hameñ ishq ne 'azīz'

duniyā meñ koī kār-e-numāyāñ na kar sake

dushwari-e-hayat ko aasan na kar sake

hum apne dard ka koi darman na kar sake

tauhin hum ne apni gawara na ki kabhi

izzat ko apni hirs pe qurban na kar sake

hum ne to apne aap ko KHud hi Dubo diya

tufan hamein Dubone ka ehsan na kar sake

ishq-e-butan mein haal se behaal ho gae

hum phir bhi kuchh najat ka saman na kar sake

marne ke ba'd qabr ka meri nishan na ho

koi rafiq us pe charaghan na kar sake

aashiq haqiqatan wahi hota hai jis ka dil

taDpe magar visal ka arman na kar sake

be-kar kar diya hai hamein ishq ne 'aziz'

duniya mein koi kar-e-numayan na kar sake