dukan-e-mai-farosh pe gar aae mohtasib

dūkān-e-mai-farosh pe gar aa.e mohtasib

din iid ke to ḳhuub ghaḌā jaa.e mohtasib

ai charḳh-e-fitna-gar ye ravā hai ki har baras

sahbā-kashoñ pe baaj kī Thahrā.e mohtasib

mastoñ ne sañgsār kyā us ko bār-hā

lekin gayā na us pe bhī saudā-e-mohtasib

hāthoñ se us ke shīsha-e-dil chuur hai mirā

yā-rab kiye kī apne sazā paa.e mohtasib

ye kū-e-mai-farosh meñ raulā huā ki raat

dahshat se vaañ Thahar na sakā pā-e-mohtasib

mast-e-sharāb-e-ishq ko bāzār-e-dahr meñ

zinhār bīm-e-shahna na parvā-e-mohtasib

kuchh de ke rishvat us ko tū pī 'mus.hafī' sharāb

sab zar ke vāste hai ye ġhauġhā-e-mohtasib

dukan-e-mai-farosh pe gar aae mohtasib

din id ke to KHub ghaDa jae mohtasib

ai charKH-e-fitna-gar ye rawa hai ki har baras

sahba-kashon pe baj ki Thahrae mohtasib

maston ne sangsar kya us ko bar-ha

lekin gaya na us pe bhi sauda-e-mohtasib

hathon se us ke shisha-e-dil chur hai mera

ya-rab kiye ki apne saza pae mohtasib

ye ku-e-mai-farosh mein raula hua ki raat

dahshat se wan Thahar na saka pa-e-mohtasib

mast-e-sharab-e-ishq ko bazar-e-dahr mein

zinhaar bim-e-shahna na parwa-e-mohtasib

kuchh de ke rishwat us ko tu pi 'mushafi' sharab

sab zar ke waste hai ye ghaugha-e-mohtasib