dur dur mujhse wo is tarah KHiraman hai

duur duur mujh se vo is tarah ḳhirāmāñ hai

har qadam hai naqsh-e-dil har nigah rag-e-jāñ hai

ban ga.ī hai mastī meñ dil kī baat hañgāma

qatra thī jo sāġhar meñ lab tak aa ke tūfāñ hai

ham to pā-e-jāñ par kar bhī aa.e ik sajda

sochtī rahī duniyā kufr hai ki īmāñ hai

mere shikva-e-ġham se ālam-e-nadāmat meñ

is lab-e-tabassum par sham.a sī farozāñ hai

ye niyāz-e-ġham-ḳhvārī ye shikast-e-dildārī

bas navāzish-e-jānāñ dil bahut pareshāñ hai

muntazir haiñ phir mere hādse zamāne ke

phir mirā junūñ terī bazm meñ ġhazal-ḳhvāñ hai

fikr kyā unheñ jab tū saath hai asīroñ ke

ai ġham-e-asīrī tū ḳhud shikast-e-zindāñ hai

apnī apnī himmat hai apnā apnā dil 'majrūh'

zindagī bhī arzāñ hai maut bhī farāvāñ hai

dur dur mujh se wo is tarah KHiraman hai

har qadam hai naqsh-e-dil har nigah rag-e-jaan hai

ban gai hai masti mein dil ki baat hangama

qatra thi jo saghar mein lab tak aa ke tufan hai

hum to pa-e-jaan par kar bhi aae ek sajda

sochti rahi duniya kufr hai ki iman hai

mere shikwa-e-gham se aalam-e-nadamat mein

is lab-e-tabassum par shama si farozan hai

ye niyaz-e-gham-KHwari ye shikast-e-dildari

bas nawazish-e-jaanan dil bahut pareshan hai

muntazir hain phir mere hadse zamane ke

phir mera junun teri bazm mein ghazal-KHwan hai

fikr kya unhen jab tu sath hai asiron ke

ai gham-e-asiri tu KHud shikast-e-zindan hai

apni apni himmat hai apna apna dil 'majruh'

zindagi bhi arzan hai maut bhi farawan hai