dur hai manzil to kya rasta to hai

duur hai manzil to kyā rasta to hai

ik nazar us ne mujhe dekhā to hai

chāñd hāthoñ meñ nahīñ to kyā huā

āsmāñ par hī sahī dikhtā to hai

ḳhush agar ġhairoñ meñ hai to ḳhush rahe

vo kahīñ bhī ho chalo achchhā to hai

kuchh nahīñ hai aur to ġham hī sahī

is bharī duniyā meñ kuchh apnā to hai

aaj vo yuuñ hī nahīñ mujh se ḳhafā

kuchh gila to hai koī shikvā to hai

kiyā bharosa us ke va.ade kā magar

dil ke ḳhush rakhne ko ik va.ada to hai

us ne rakkhā hai takalluf kā bharam

ab adāvat par koī parda to hai

aa rahā hai vo bhī āḳhir raah par

sun ke merā zikr kuchh kahtā to hai

dil nahīñ 'āzim' chalo jaañ hī sahī

ḳhair us ne mujh se kuchh māñgā to hai

dur hai manzil to kya rasta to hai

ek nazar us ne mujhe dekha to hai

chand hathon mein nahin to kya hua

aasman par hi sahi dikhta to hai

KHush agar ghairon mein hai to KHush rahe

wo kahin bhi ho chalo achchha to hai

kuchh nahin hai aur to gham hi sahi

is bhari duniya mein kuchh apna to hai

aaj wo yun hi nahin mujh se KHafa

kuchh gila to hai koi shikwa to hai

kiya bharosa us ke wade ka magar

dil ke KHush rakhne ko ek wada to hai

us ne rakkha hai takalluf ka bharam

ab adawat par koi parda to hai

aa raha hai wo bhi aaKHir rah par

sun ke mera zikr kuchh kahta to hai

dil nahin 'azim' chalo jaan hi sahi

KHair us ne mujh se kuchh manga to hai