dur tak jin ka koi naqsh nahin hai yaro

duur tak jin kā koī naqsh nahīñ hai yaaro

aise hī qadmoñ pe apnī bhī jabīñ hai yaaro

ek saudā-e-mohabbat ke sivā duniyā meñ

merā sarmāya-e-dil kuchh bhī nahīñ hai yaaro

ham ne sar ḳham na kiyā sañg-zanoñ ke aage

bas isī jurm pe majrūh jabīñ hai yaaro

vo bhī tanhā.ī meñ rotā hai mire dil kī tarah

jaane kyoñ mujh ko ye rañgīn yaqīñ hai yaaro

dil girāñ-bār agar ho to nazāroñ kī qasam

sub.h pur-kaif hai na shaam hasīñ hai yaaro

vo to sarshār-e-ġham-e-ishq hai aur kuchh bhī nahīñ

kaun kahtā hai ki 'sarvar' bhī hazīñ hai yaaro

dur tak jin ka koi naqsh nahin hai yaro

aise hi qadmon pe apni bhi jabin hai yaro

ek sauda-e-mohabbat ke siwa duniya mein

mera sarmaya-e-dil kuchh bhi nahin hai yaro

hum ne sar KHam na kiya sang-zanon ke aage

bas isi jurm pe majruh jabin hai yaro

wo bhi tanhai mein rota hai mere dil ki tarah

jaane kyon mujh ko ye rangin yaqin hai yaro

dil giran-bar agar ho to nazaron ki qasam

subh pur-kaif hai na sham hasin hai yaro

wo to sarshaar-e-gham-e-ishq hai aur kuchh bhi nahin

kaun kahta hai ki 'sarwar' bhi hazin hai yaro