dur tha sahil bahut dariya bhi tughyani mein tha

duur thā sāhil bahut dariyā bhī tuġhyānī meñ thā

ik shikasta-nāv sā maiñ tez-rau paanī meñ thā

mujh se milne koī aatā bhī to miltā kis tarah

maiñ to ghar meñ band ḳhud apnī nigahbānī meñ thā

ādamiyat ke evaz us ne ḳharīdā hai libās

aadmī thā aadmī jab ahd-e-uryānī meñ thā

hai club ke rañg-o-rāmish meñ bhī mere saath saath

ek sannāTā jo dil kī ḳhāna-vīrānī meñ thā

thā vo mere ḳhair-maqdam ko ba-zāhir pesh pesh

aks-e-dīgar lekin us kī ḳhanda-peshānī meñ thā

maqtal-e-shām-o-sahar meñ kyā panaptī zindagī

shabnamistāñ hoñkte sho.aloñ kī nigarānī meñ thā

mausam-e-gul bhī junūñ-parvar thā lekin beshtar

maslahat kā haath merī chāk-dāmānī meñ thā

'sābir' us manzar kī movie le rahā thā ek shaḳhs

shāḳh par ik āshiyāñ sho.aloñ kī tābānī meñ thā

dur tha sahil bahut dariya bhi tughyani mein tha

ek shikasta-naw sa main tez-rau pani mein tha

mujh se milne koi aata bhi to milta kis tarah

main to ghar mein band KHud apni nigahbani mein tha

aadamiyat ke ewaz us ne KHarida hai libas

aadmi tha aadmi jab ahd-e-uryani mein tha

hai club ke rang-o-ramish mein bhi mere sath sath

ek sannaTa jo dil ki KHana-virani mein tha

tha wo mere KHair-maqdam ko ba-zahir pesh pesh

aks-e-digar lekin us ki KHanda-peshani mein tha

maqtal-e-sham-o-sahar mein kya panapti zindagi

shabnamistan honkte shoalon ki nigarani mein tha

mausam-e-gul bhi junun-parwar tha lekin beshtar

maslahat ka hath meri chaak-damani mein tha

'sabir' us manzar ki mowie le raha tha ek shaKHs

shaKH par ek aashiyan shoalon ki tabani mein tha