ehsas-e-gham-e-ishq ka hasil nahin hota

ehsās-e-ġham-e-ishq kā hāsil nahīñ hotā

vo dard ke jo ruuh meñ shāmil nahīñ hotā

ai zauq-e-nazar bhuul bhī jā zauq-e-nazar ko

afsāna kabhī ziist kā hāsil nahīñ hotā

ai dost vafā-sāz-e-mohabbat kī nazar meñ

bigḌī ko banā lenā to mushkil nahīñ hotā

manzil to baḌī chiiz hai rāheñ nahīñ miltīñ

jab shauq-e-talab rahbar-e-manzil nahīñ hotā

aksar mirī āñkhoñ ne bhī iz.hār kiyā hai

lekin unheñ ehsās-e-ġham-e-dil nahīñ hotā

tūfān kī āġhosh meñ ghar DhūñDne vaalā

mamnūn-e-tunak-zarfī-e-sāhil nahīñ hotā

'bāsit' vo diyā karte haiñ taskīn to lekin

ik lafz bhī taskīn ke qābil nahīñ hotā

ehsas-e-gham-e-ishq ka hasil nahin hota

wo dard ke jo ruh mein shamil nahin hota

ai zauq-e-nazar bhul bhi ja zauq-e-nazar ko

afsana kabhi zist ka hasil nahin hota

ai dost wafa-saz-e-mohabbat ki nazar mein

bigDi ko bana lena to mushkil nahin hota

manzil to baDi chiz hai rahen nahin miltin

jab shauq-e-talab rahbar-e-manzil nahin hota

aksar meri aankhon ne bhi izhaar kiya hai

lekin unhen ehsas-e-gham-e-dil nahin hota

tufan ki aaghosh mein ghar DhunDne wala

mamnun-e-tunak-zarfi-e-sahil nahin hota

'basit' wo diya karte hain taskin to lekin

ek lafz bhi taskin ke qabil nahin hota