ehsas ka wasil-e-izhaar hai ghazal

ehsās kā vasīl-e-iz.hār hai ġhazal

ā.īna-dār-e-nudrat-e-afkār hai ġhazal

urdu adab ko jis pe hamesha rahegā naaz

iz.hār-e-fikr-o-fan kā vo me.aar hai ġhazal

guldasta-e-adab kā gul-e-sar-sabd hai ye

haiñ jis meñ gul-ezār vo gulzār hai ġhazal

aatī hai jis vasīle se dil se zabān par

ḳhvābīda hasratoñ kā vo iz.hār hai ġhazal

urdu zabān dil hai ġhazal us kī jaan hai

nau-e-bashar kī mūnis-o-ġham-ḳhvār hai ġhazal

pahle hadīs-e-dilbarī kahte the is ko log

ab tarjumān-e-kūcha-o-bāzār hai ġhazal

pesh-e-nazar agar ho 'valī'-dakkanī kā tarz

mashshāta-e-arūs-e-trahdār hai ġhazal

hai 'mīr' o 'zauq' o 'ġhālib' o 'momin' ko jo aziiz

vo dil-navāz jalva-gah-e-yār hai ġhazal

'barqī' ke fikr-o-fan kā muraqqa.a isī meñ hai

'barq'-āzmī se matla-e-anvār hai ġhazal

ehsas ka wasil-e-izhaar hai ghazal

aaina-dar-e-nudrat-e-afkar hai ghazal

urdu adab ko jis pe hamesha rahega naz

izhaar-e-fikr-o-fan ka wo mear hai ghazal

guldasta-e-adab ka gul-e-sar-sabd hai ye

hain jis mein gul-ezar wo gulzar hai ghazal

aati hai jis wasile se dil se zaban par

KHwabida hasraton ka wo izhaar hai ghazal

urdu zaban dil hai ghazal us ki jaan hai

nau-e-bashar ki munis-o-gham-KHwar hai ghazal

pahle hadis-e-dilbari kahte the is ko log

ab tarjuman-e-kucha-o-bazar hai ghazal

pesh-e-nazar agar ho 'wali'-dakkani ka tarz

mashshata-e-arus-e-trahdar hai ghazal

hai 'mir' o 'zauq' o 'ghaalib' o 'momin' ko jo aziz

wo dil-nawaz jalwa-gah-e-yar hai ghazal

'barqi' ke fikr-o-fan ka muraqqa isi mein hai

'barq'-azmi se matla-e-anwar hai ghazal