gale lagaen karen tumko pyar eid ke din

gale lagā.eñ kareñ tum ko pyaar eid ke din

idhar to aao mire gul-ezār eid ke din

ġhazab kā husn hai ārā.isheñ qayāmat kī

ayaañ hai qudrat-e-parvardigār eid ke din

sañbhal sakī na tabī.at kisī tarah merī

rahā na dil pe mujhe iḳhtiyār eid ke din

vo saal bhar se kudūrat bharī jo thī dil meñ

vo duur ho ga.ī bas ek baar eid ke din

lagā liyā unheñ siine se josh-e-ulfat meñ

ġharaz ki aa hī gayā mujh ko pyaar eid ke din

kahīñ hai naġhma-e-bulbul kahīñ hai ḳhanda-e-gul

ayaañ hai josh-e-shabāb-e-bahār eid ke din

sivayyāñ duudh shakar meva sab muhayyā hai

magar ye sab hai mujhe nāgavār eid ke din

mile agar lab-e-shīrīñ kā tere ik bosa

to lutf ho mujhe albatta yaar eid ke din

gale lagaen karen tum ko pyar eid ke din

idhar to aao mere gul-ezar eid ke din

ghazab ka husn hai aaraishen qayamat ki

ayan hai qudrat-e-parwardigar eid ke din

sanbhal saki na tabiat kisi tarah meri

raha na dil pe mujhe iKHtiyar eid ke din

wo sal bhar se kudurat bhari jo thi dil mein

wo dur ho gai bas ek bar eid ke din

laga liya unhen sine se josh-e-ulfat mein

gharaz ki aa hi gaya mujh ko pyar eid ke din

kahin hai naghma-e-bulbul kahin hai KHanda-e-gul

ayan hai josh-e-shabab-e-bahaar eid ke din

siwayyan dudh shakar mewa sab muhayya hai

magar ye sab hai mujhe nagawar eid ke din

mile agar lab-e-shirin ka tere ek bosa

to lutf ho mujhe albatta yar eid ke din