phir dil ko roz o shab ki wahi id chahiye

phir dil ko roz o shab kī vahī iid chāhiye

TuuTe ta.alluqāt kī tajdīd chāhiye

ḳhālī nahīñ hai ek bhī bistar makān meñ

ik ḳhvāb dekhne ke liye niiñd chāhiye

ham māñgte rahe tire ruḳhsār o lab kī ḳhair

ai sāhab-e-jamāl tirī diid chāhiye

ham ko to ik rifāqat-e-āshufta-sar bahut

in ko hujūm-e-rāh kī tā.īd chāhiye

har āstīñ ke ḳhuun ne qātil batā diye

shahr-e-sitam ko zulm kī tardīd chāhiye

ham par zamīñ ke raaz to sab munkashif hue

ab āsmāñ ke hone kī tamhīd chāhiye

phir dil ko roz o shab ki wahi id chahiye

TuTe talluqat ki tajdid chahiye

KHali nahin hai ek bhi bistar makan mein

ek KHwab dekhne ke liye nind chahiye

hum mangte rahe tere ruKHsar o lab ki KHair

ai sahab-e-jamal teri did chahiye

hum ko to ek rifaqat-e-ashufta-sar bahut

in ko hujum-e-rah ki taid chahiye

har aastin ke KHun ne qatil bata diye

shahr-e-sitam ko zulm ki tardid chahiye

hum par zamin ke raaz to sab munkashif hue

ab aasman ke hone ki tamhid chahiye