ek aalam pe bar hain hum log

ek aalam pe baar haiñ ham log

ādatan sogvār haiñ ham log

gardish-e-pā junūñ baḌhātī hai

sañg-e-rah kī pukār haiñ ham log

pichhlī sab ranjishoñ ko bhuul bhī jā

ab tire ġham-gusār haiñ ham log

jānte haiñ hunar mohabbat kā

ahl-e-dil meñ shumār haiñ ham log

ab hameñ log hañs ke milte haiñ

ab bahut sāzgār haiñ ham log

ham ne mafhūm ko zabāñ dī hai

harf kā e'tibār haiñ ham log

koī chehra to raushnī laa.e

vāhimoñ kā shikār haiñ ham log

ab tirī dostī ke qābil haiñ

dil-girafta-o-dil-figār haiñ ham log

dil churāne kā kaam karte haiñ

bar-sar-e-rozgār haiñ ham log

ek pal bhī sukūñ nahīñ miltā

kis qadar be-qarār haiñ ham log

shahryārī bhī ik nasha hai 'amīr'

tere hisse kā pyaar haiñ ham log

ek aalam pe bar hain hum log

aadatan sogwar hain hum log

gardish-e-pa junun baDhati hai

sang-e-rah ki pukar hain hum log

pichhli sab ranjishon ko bhul bhi ja

ab tere gham-gusar hain hum log

jaante hain hunar mohabbat ka

ahl-e-dil mein shumar hain hum log

ab hamein log hans ke milte hain

ab bahut sazgar hain hum log

hum ne mafhum ko zaban di hai

harf ka e'tibar hain hum log

koi chehra to raushni lae

wahimon ka shikar hain hum log

ab teri dosti ke qabil hain

dil-girafta-o-dil-figar hain hum log

dil churane ka kaam karte hain

bar-sar-e-rozgar hain hum log

ek pal bhi sukun nahin milta

kis qadar be-qarar hain hum log

shahryari bhi ek nasha hai 'amir'

tere hisse ka pyar hain hum log