ek aaseb ka saya tha jo sar se utra

ek aaseb kā saaya thā jo sar se utrā

jaise ik tā.ir-e-manhūs shajar se utrā

yuuñ lagā jaise girāñ-bārī-e-shab ḳhatm huī

ġhāza-e-kizb-o-riyā rū-e-sahar se utrā

apnā ghar bhī mujhe zindāñ kī tarah lagtā thā

zañg-ālūd sā taalā mire dar se utrā

shāyad ab talḳh haqā.eq se shanāsā.ī ho

kor-chashmī kā ye parda sā nazar se utrā

ġham kā iz.hār nahīñ ashk-e-nadāmat jaano

qatra-e-āb agar dīda-e-tar se utrā

rahrav-e-dasht-e-balā ranj-e-safar bhūlegā

taḳht-e-bilqīs agar gard-e-safar se utrā

ab shafaq-rañg ujāloñ kā samāñ dekheñge

halqa-e-abr-e-siyah shams-o-qamar se utrā

ek aaseb ka saya tha jo sar se utra

jaise ek tair-e-manhus shajar se utra

yun laga jaise giran-bari-e-shab KHatm hui

ghaza-e-kizb-o-riya ru-e-sahar se utra

apna ghar bhi mujhe zindan ki tarah lagta tha

zang-alud sa tala mere dar se utra

shayad ab talKH haqaeq se shanasai ho

kor-chashmi ka ye parda sa nazar se utra

gham ka izhaar nahin ashk-e-nadamat jaano

qatra-e-ab agar dida-e-tar se utra

rahraw-e-dasht-e-bala ranj-e-safar bhulega

taKHt-e-bilqis agar gard-e-safar se utra

ab shafaq-rang ujalon ka saman dekhenge

halqa-e-abr-e-siyah shams-o-qamar se utra