ek aisi bhi tajalli aaj mai-KHane mein hai

ek aisī bhī tajallī aaj mai-ḳhāne meñ hai

lutf piine meñ nahīñ hai balki kho jaane meñ hai

ma.ani-e-ādam kujā aur sūrat-e-ādam kujā

ye nihāñ-ḳhāne meñ thā ab tak nihāñ-ḳhāne meñ hai

ḳhirman-e-bulbul to phūñkā ishq-e-ātish-rañg ne

rañg ko shola banā kar kaun parvāne meñ hai

jalva-e-husn-e-parastish garmi-e-husn-e-niyāz

varna kuchh kaabe meñ rakkhā hai na but-ḳhāne meñ hai

rind ḳhālī haath baiThe haiñ uḌā kar juzv o kul

ab na kuchh shīshe meñ hai baaqī na paimāne meñ hai

maiñ ye kahtā huuñ fanā ko bhī atā kar zindagī

tū kamāl-e-zindagī kahtā hai mar jaane meñ hai

jis pe but-ḳhāna tasadduq jis pe kaaba bhī nisār

ek sūrat aisī bhī sunte haiñ but-ḳhāne meñ hai

kyā bahār-e-naqsh-e-pā hai ai niyāz-e-āshiqī

lutf sar rakhne meñ kyā sar rakh ke mar jaane meñ hai

be-ḳhudī meñ dekhtā huuñ be-niyāzī kī adā

kyā fanā-e-zindagī ḳhud husn ban jaane meñ hai

ek aisi bhi tajalli aaj mai-KHane mein hai

lutf pine mein nahin hai balki kho jaane mein hai

mani-e-adam kuja aur surat-e-adam kuja

ye nihan-KHane mein tha ab tak nihan-KHane mein hai

KHirman-e-bulbul to phunka ishq-e-atish-rang ne

rang ko shola bana kar kaun parwane mein hai

jalwa-e-husn-e-parastish garmi-e-husn-e-niyaz

warna kuchh kabe mein rakkha hai na but-KHane mein hai

rind KHali hath baiThe hain uDa kar juzw o kul

ab na kuchh shishe mein hai baqi na paimane mein hai

main ye kahta hun fana ko bhi ata kar zindagi

tu kamal-e-zindagi kahta hai mar jaane mein hai

jis pe but-KHana tasadduq jis pe kaba bhi nisar

ek surat aisi bhi sunte hain but-KHane mein hai

kya bahaar-e-naqsh-e-pa hai ai niyaz-e-ashiqi

lutf sar rakhne mein kya sar rakh ke mar jaane mein hai

be-KHudi mein dekhta hun be-niyazi ki ada

kya fana-e-zindagi KHud husn ban jaane mein hai