ek diya dahliz pe rakha bhul gaya

ek diyā dahlīz pe rakkhā bhuul gayā

ghar ko lauT ke aane vaalā bhuul gayā

ye kaisī be-āb zamīñ kā sāmnā thā

ḳhud ko qatra qatre ko dariyā bhuul gayā

maiñ to thā maujūd kitāb ke lafzoñ meñ

vo hī shāyad mujh ko paḌhnā bhuul gayā

kis ke jism kī bārish ne sairāb kiyā

kyuuñ uḌnā mausam kā parinda bhuul gayā

āḳhir ye honā thā āḳhir yahī huā

duniyā mujh ko aur maiñ duniyā bhuul gayā

maiñ bhī huuñ mansūb kisī ke qatl se ab

sūraj merī chhat pe chamaknā bhuul gayā

vafā kā khoTā sikka kab tak chaltā 'tūr'

achchhā huā jo apnā parāyā bhuul gayā

ek diya dahliz pe rakkha bhul gaya

ghar ko lauT ke aane wala bhul gaya

ye kaisi be-ab zamin ka samna tha

KHud ko qatra qatre ko dariya bhul gaya

main to tha maujud kitab ke lafzon mein

wo hi shayad mujh ko paDhna bhul gaya

kis ke jism ki barish ne sairab kiya

kyun uDna mausam ka parinda bhul gaya

aaKHir ye hona tha aaKHir yahi hua

duniya mujh ko aur main duniya bhul gaya

main bhi hun mansub kisi ke qatl se ab

suraj meri chhat pe chamakna bhul gaya

wafa ka khoTa sikka kab tak chalta 'tur'

achchha hua jo apna paraya bhul gaya