ek gardan shab-o-roz wo gardante hain

ek gardān shab-o-roz vo gardānte haiñ

kyā haqīqat hai pas-e-parda nahīñ jānte haiñ

zindagī ham tire dhoke meñ nahīñ ā.eñge

zindagī ham tire bahrūp ko pahchānte haiñ

koī din aur ki chamkeñge sitāra ban kar

ḳhaak alfāz ke sahrā kī abhī chhānte haiñ

phir havā chāhe jahāñ un ko uḌā le jaa.e

be-ḳhabar ruḳh jo havā kā nahīñ pahchānte haiñ

ūñchī dastār se dhoke meñ na aa jaa.eñ aap

ye faqīhān-e-haram haiñ inheñ ham jānte haiñ

bārhā un se kahā thā na tamāshā kiije

hujjatī log magar baat kahāñ mānte haiñ

ek gardan shab-o-roz wo gardante hain

kya haqiqat hai pas-e-parda nahin jaante hain

zindagi hum tere dhoke mein nahin aaenge

zindagi hum tere bahrup ko pahchante hain

koi din aur ki chamkenge sitara ban kar

KHak alfaz ke sahra ki abhi chhante hain

phir hawa chahe jahan un ko uDa le jae

be-KHabar ruKH jo hawa ka nahin pahchante hain

unchi dastar se dhoke mein na aa jaen aap

ye faqihan-e-haram hain inhen hum jaante hain

barha un se kaha tha na tamasha kije

hujjati log magar baat kahan mante hain