ek guman ka haal hai aur faqat guman mein hai

ek gumāñ kā haal hai aur faqat gumāñ meñ hai

kis ne azāb-e-jāñ sahā kaun azāb-e-jāñ meñ hai

lamha-ba-lamha dam-ba-dam ān-ba-ān ram-ba-ram

maiñ bhī guzishtagāñ meñ huuñ tū bhī guzishtagāñ meñ hai

ādam-o-zāt-o-kibriyā karb meñ haiñ judā judā

kyā kahūñ un kā mājrā jo bhī hai imtihāñ meñ hai

shāḳh se uḌ gayā parind hai dil-e-shām-e-dard-mand

sahn meñ hai malāl sā huzn sā āsmāñ meñ hai

ḳhud meñ bhī be-amāñ huuñ maiñ tujh meñ bhī be-amāñ huuñ maiñ

kaun sahegā us kā ġham vo jo mirī amaañ meñ hai

kaisā hisāb kyā hisāb hālat-e-hāl hai azaab

zaḳhm nafas nafas meñ hai zahr zamāñ zamāñ meñ hai

us kā firāq bhī ziyāñ us kā visāl bhī ziyāñ

ek ajiib kashmakash halqa-e-be-dilāñ meñ hai

būd-o-nabūd kā hisāb maiñ nahīñ jāntā magar

saare vajūd kī nahīñ mere adam kī haañ meñ hai

ek guman ka haal hai aur faqat guman mein hai

kis ne azab-e-jaan saha kaun azab-e-jaan mein hai

lamha-ba-lamha dam-ba-dam aan-ba-an ram-ba-ram

main bhi guzishtagan mein hun tu bhi guzishtagan mein hai

aadam-o-zat-o-kibriya karb mein hain juda juda

kya kahun un ka majra jo bhi hai imtihan mein hai

shaKH se uD gaya parind hai dil-e-sham-e-dard-mand

sahn mein hai malal sa huzn sa aasman mein hai

KHud mein bhi be-aman hun main tujh mein bhi be-aman hun main

kaun sahega us ka gham wo jo meri aman mein hai

kaisa hisab kya hisab haalat-e-haal hai azab

zaKHm nafas nafas mein hai zahr zaman zaman mein hai

us ka firaq bhi ziyan us ka visal bhi ziyan

ek ajib kashmakash halqa-e-be-dilan mein hai

bud-o-nabud ka hisab main nahin jaanta magar

sare wajud ki nahin mere adam ki han mein hai