ek ek gam pe pathraw hua hai mujh mein

ek ik gaam pe pathrāv huā hai mujh meñ

silsila ġham kā bahut duur chalā hai mujh meñ

itnā phailā huuñ simaTnā hī paḌegā shāyad

koī shiddat se mujhe DhūñD rahā hai mujh meñ

ashk Tapke to koī raaz kī tahrīr milī

aur kyā kyā nahīñ ma.alūm likhā hai mujh meñ

gūñjtā rahtā huuñ maiñ koī sune yā na sune

bhūlī-bisrī huī yādoñ kī sadā hai mujh meñ

hogī zaa.il na kabhī mere nafas kī ḳhushbū

ġham tirā uud kī mānind jalā hai mujh meñ

tāq-e-nisyāñ pe diyā kis ne ye rakh chhoḌā hai

ek muddat se jalā hai na bujhā hai mujh meñ

ek manzar bhī na dekhā gayā mujh se 'kāvish'

saare aalam ko koī dekh rahā hai mujh meñ

ek ek gam pe pathraw hua hai mujh mein

silsila gham ka bahut dur chala hai mujh mein

itna phaila hun simaTna hi paDega shayad

koi shiddat se mujhe DhunD raha hai mujh mein

ashk Tapke to koi raaz ki tahrir mili

aur kya kya nahin malum likha hai mujh mein

gunjta rahta hun main koi sune ya na sune

bhuli-bisri hui yaadon ki sada hai mujh mein

hogi zail na kabhi mere nafas ki KHushbu

gham tera ud ki manind jala hai mujh mein

taq-e-nisyan pe diya kis ne ye rakh chhoDa hai

ek muddat se jala hai na bujha hai mujh mein

ek manzar bhi na dekha gaya mujh se 'kawish'

sare aalam ko koi dekh raha hai mujh mein