ek muddat se kuchh bhi likha hi nahin

ek muddat se kuchh bhī likhā hī nahīñ

zaḳhm shāyad koī ab harā hī nahīñ

āj-kal tum bahut ḳhush ho mere sanam

'ishq tum ko abhī to huā hī nahīñ

vo ḳhafā haiñ ki un se mohabbat huī

is meñ merī to koī ḳhatā hī nahīñ

jī nahīñ jī nahīñ jī nahīñ jī nahīñ

aap jaisā koī dūsrā hī nahīñ

nabz merī pakaḌ ke ye us ne kahā

rog tujh ko to kuchh bhī nayā hī nahīñ

ye ḳhatā un nigāhoñ kī hai zāhido

jaam varna to maiñ ne chhuā hī nahīñ

jagmagāhaT to ye un ke aane se hai

chāñd varna abhī tak khilā hī nahīñ

kyoñ kitāboñ meñ qānūn kī munsifoñ

dil dukhāne kī koī sazā hī nahīñ

maiñ ne sochā kahūñ chāñd par ik ġhazal

qāfiya tum se achchhā milā haiñ nahīñ

haath maañ kā agar jo tire sar pe hai

is se baḌh kar to koī du'ā hī nahīñ

ek muddat se kuchh bhi likha hi nahin

zaKHm shayad koi ab hara hi nahin

aaj-kal tum bahut KHush ho mere sanam

'ishq tum ko abhi to hua hi nahin

wo KHafa hain ki un se mohabbat hui

is mein meri to koi KHata hi nahin

ji nahin ji nahin ji nahin ji nahin

aap jaisa koi dusra hi nahin

nabz meri pakaD ke ye us ne kaha

rog tujh ko to kuchh bhi naya hi nahin

ye KHata un nigahon ki hai zahido

jam warna to main ne chhua hi nahin

jagmagahaT to ye un ke aane se hai

chand warna abhi tak khila hi nahin

kyon kitabon mein qanun ki munsifon

dil dukhane ki koi saza hi nahin

main ne socha kahun chand par ek ghazal

qafiya tum se achchha mila hain nahin

hath man ka agar jo tere sar pe hai

is se baDh kar to koi du'a hi nahin