ek sadme se har din ubharti rahi

ek sadme se har din ubhartī rahī

roz jiitī rahī roz martī rahī

jis ko paanā hī mumkin nahīñ thā kabhī

'umr-bhar us ko khone se Dartī rahī

sīḌhiyāñ kāmyābī kī chaḌhte hue

maiñ bahut se diloñ se utartī rahī

dūsroñ ko maiñ marham lagāte hue

apne dil par lage zaḳhm bhartī rahī

'ishq karnā kisī aur kā kaam thā

maiñ kisī aur kā kaam kartī rahī

mujh ko poshīda rakhnī thī sāda-dilī

so maiñ huliye se bantī sañvartī rahī

'ishq mujh ko bhī hone lagā thā magar

maiñ zamāne ke Dar se mukartī rahī

'ishq kahne ko donoñ taraf thā magar

vo simaTtā gayā maiñ bikhartī rahī

ek sadme se har din ubharti rahi

roz jiti rahi roz marti rahi

jis ko pana hi mumkin nahin tha kabhi

'umr-bhar us ko khone se Darti rahi

siDhiyan kaamyabi ki chaDhte hue

main bahut se dilon se utarti rahi

dusron ko main marham lagate hue

apne dil par lage zaKHm bharti rahi

'ishq karna kisi aur ka kaam tha

main kisi aur ka kaam karti rahi

mujh ko poshida rakhni thi sada-dili

so main huliye se banti sanwarti rahi

'ishq mujh ko bhi hone laga tha magar

main zamane ke Dar se mukarti rahi

'ishq kahne ko donon taraf tha magar

wo simaTta gaya main bikharti rahi