ek se rabt ek se hai bigaD

ek se rabt ek se hai bigāḌ

roz hai vaañ yahī ukhāḌ-pachhāḌ

ab vo dil meñ kabhī nahīñ aate

muddatoñ se ye ghar paḌā hai ujaaḌ

kyuuñ hai bekār mausam-e-gul meñ

jeb kar chaak aur garebāñ phaaḌ

kār-e-āshiq jo ho nigah meñ durust

kahiye kyā aap kā hai is meñ bigāḌ

kahte ho ġhair jaa.e to aa.uuñ

ḳhuub rakkhī hai aap ne ye aaḌ

sang-dil rakh-rakhāv dil kā rakh

kahīñ is shīshe meñ na aa.e darāḌ

ġhair jaa.e to kaam kyuuñ na bane

duur chhātī se ho kahīñ ye phaaḌ

qad ko un ke kahā thā sarv to vo

pīchhe lipTe haiñ mere ho kar jhaaḌ

'ishq se rah alag jahāñ tak ho

kahīñ sar par na aa paḌe ye phaaḌ

qatl to kar chuke na ho badnām

mere lāshe ko do zamīn meñ gaaḌ

us kā chhāyā huā hai abr-e-sitam

kyuuñ na tīroñ kī mujh pe ho bauchhaḌ

koī mehmān taaza vārid hai

band rahte haiñ raat din jo kivāḌ

vo tafañg-e-mizha haiñ saf-ārā

tum pe 'majrūh' chal na jaa.e baaḌ

ek se rabt ek se hai bigaD

roz hai wan yahi ukhaD-pachhaD

ab wo dil mein kabhi nahin aate

muddaton se ye ghar paDa hai ujaD

kyun hai bekar mausam-e-gul mein

jeb kar chaak aur gareban phaD

kar-e-ashiq jo ho nigah mein durust

kahiye kya aap ka hai is mein bigaD

kahte ho ghair jae to aaun

KHub rakkhi hai aap ne ye aaD

sang-dil rakh-rakhaw dil ka rakh

kahin is shishe mein na aae daraD

ghair jae to kaam kyun na bane

dur chhati se ho kahin ye phaD

qad ko un ke kaha tha sarw to wo

pichhe lipTe hain mere ho kar jhaD

'ishq se rah alag jahan tak ho

kahin sar par na aa paDe ye phaD

qatl to kar chuke na ho badnam

mere lashe ko do zamin mein gaD

us ka chhaya hua hai abr-e-sitam

kyun na tiron ki mujh pe ho bauchhaD

koi mehman taza warid hai

band rahte hain raat din jo kiwaD

wo tafang-e-mizha hain saf-ara

tum pe 'majruh' chal na jae baD