ek surat to hai jo usne mohabbat ki hai

ek sūrat to hai jo us ne mohabbat kī hai

baat jazbe kī hai yā baat zarūrat kī hai

vo bhī kaisā hai kasak dil kī samajhtā hī nahīñ

maiñ bhī kaisā huuñ na shikva na shikāyat kī hai

hausla haar diyā jald hī maiñ ne apnā

chhoḌ dene meñ zarā us ne bhī ujlat kī hai

kyā sitam hai ki bahāroñ ke hasīñ mausam meñ

ham parindoñ ne tire shahr se hijrat kī hai

kuchh namī sī mirī āñkhoñ meñ umañD aatī hai

jab kahe koī ki maiñ ne bhī mohabbat kī hai

chāhe saarā hī zamāna hai muḳhālif us kā

phir bhī 'āriz' ne faqat us kī himāyat kī hai

ek surat to hai jo us ne mohabbat ki hai

baat jazbe ki hai ya baat zarurat ki hai

wo bhi kaisa hai kasak dil ki samajhta hi nahin

main bhi kaisa hun na shikwa na shikayat ki hai

hausla haar diya jald hi main ne apna

chhoD dene mein zara us ne bhi ujlat ki hai

kya sitam hai ki bahaaron ke hasin mausam mein

hum parindon ne tere shahr se hijrat ki hai

kuchh nami si meri aankhon mein umanD aati hai

jab kahe koi ki main ne bhi mohabbat ki hai

chahe sara hi zamana hai muKHalif us ka

phir bhi 'ariz' ne faqat us ki himayat ki hai