ek to nainan kajrare aur tis par Dube kajal mein

ek to naināñ kajrāre aur tis par Duube kājal meñ

bijlī kī baḌh jaa.e chamak kuchh aur bhī gahre bādal meñ

aaj zarā lalchā.ī nazar se us ko bas kyā dekh liyā

pag-pag us ke dil kī dhaḌkan utrī aa.e paa.el meñ

pyāse pyāse naināñ us ke jaane paglī chāhe kyā

taT par jab bhī jaave soche nadiyā bhar luuñ chhāgal meñ

sub.h nahāne juuḌā khole naag badan se aa lipTeñ

us kī rañgat us kī ḳhushbū kitnī miltī sandal meñ

gorī is sansār meñ mujh ko aisā terā ruup lage

jaise koī diip jalā ho ghor añdhere jañgal meñ

pyaar kī yuuñ har buuñd jalā dī maiñ ne apne siine meñ

jaise koī jaltī māchis Daal de pī kar botal meñ

aaj pata kyā kaun se lamhe kaun sā tūfāñ jaag uThe

jaane kitnī dard kī sadiyāñ guuñj rahī haiñ pal pal meñ

ek to nainan kajrare aur tis par Dube kajal mein

bijli ki baDh jae chamak kuchh aur bhi gahre baadal mein

aaj zara lalchai nazar se us ko bas kya dekh liya

pag-pag us ke dil ki dhaDkan utri aae pael mein

pyase pyase nainan us ke jaane pagli chahe kya

taT par jab bhi jawe soche nadiya bhar lun chhagal mein

subh nahane juDa khole nag badan se aa lipTen

us ki rangat us ki KHushbu kitni milti sandal mein

gori is sansar mein mujh ko aisa tera rup lage

jaise koi dip jala ho ghor andhere jangal mein

pyar ki yun har bund jala di main ne apne sine mein

jaise koi jalti machis Dal de pi kar botal mein

aaj pata kya kaun se lamhe kaun sa tufan jag uThe

jaane kitni dard ki sadiyan gunj rahi hain pal pal mein