ek ujli umang uDai thi

ek ujlī umañg uḌaa.ī thī

ham ne tum ne patañg uḌaa.ī thī

shaam bārish meñ tere chehre se

abr ne qaus-e-rañg uḌaa.ī thī

maiñ ne bachpan kī ḳhushbū-e-nāzuk

ek titlī ke sañg uḌaa.ī thī

apnī hī az-rah-e-tafannun-e-taba.a

dhajjī-e-nām-o-nañg aḌaa.ī thī

ḳhvāb ne kis ḳhumār kī ḳhāshāk

darmiyān-e-palañg uḌaa.ī thī

koī bairūnī aañch thī jis ne

andarūnī tarañg uḌaa.ī thī

chhīn kar ek dūsre kī baqā

ham ne taz.hīk-e-jañg uḌaa.ī thī

ehtimām-e-dhamāl kho baiThā

kis ne ḳhāk-e-malañg uḌaa.ī thī

mere chāroñ taraf laboñ kī dhanak

us ne lagte hī añg uḌaa.ī thī

ham ne pūchhā nahīñ hamārī anā

kis se ho kar dabañg uḌaa.ī thī

phuljhaḌī thī ki tere kūche meñ

taan gā kar talañg uḌaa.ī thī

ḳhud se thā bair paanī meñ rah kar

ham ne mauj-e-nahañg uḌaa.ī thī

ek din ham ne haath phailā kar

chādar-e-pā-e-tañg uḌaa.ī thī

parḳhache chāroñ or bikhre the

ik badan ne surañg uḌaa.ī thī

pheñk kar apne dostoñ kī taraf

izz-o-jāh-e-ḳhadañg uḌaa.ī thī

zā.iqa jā sakā na muñh se 'naved'

da.avat-e-shoḳh-o-shañg uḌaa.ī thī

ek ujli umang uDai thi

hum ne tum ne patang uDai thi

sham barish mein tere chehre se

abr ne qaus-e-rang uDai thi

main ne bachpan ki KHushbu-e-nazuk

ek titli ke sang uDai thi

apni hi az-rah-e-tafannun-e-taba

dhajji-e-nam-o-nang aDai thi

KHwab ne kis KHumar ki KHashak

darmiyan-e-palang uDai thi

koi bairuni aanch thi jis ne

andaruni tarang uDai thi

chhin kar ek dusre ki baqa

hum ne tazhik-e-jang uDai thi

ehtimam-e-dhamal kho baiTha

kis ne KHak-e-malang uDai thi

mere chaaron taraf labon ki dhanak

us ne lagte hi ang uDai thi

hum ne puchha nahin hamari ana

kis se ho kar dabang uDai thi

phuljhaDi thi ki tere kuche mein

tan ga kar talang uDai thi

KHud se tha bair pani mein rah kar

hum ne mauj-e-nahang uDai thi

ek din hum ne hath phaila kar

chadar-e-pa-e-tang uDai thi

parKHache chaaron or bikhre the

ek badan ne surang uDai thi

phenk kar apne doston ki taraf

izz-o-jah-e-KHadang uDai thi

zaiqa ja saka na munh se 'nawed'

dawat-e-shoKH-o-shang uDai thi