ایک زمانے میں جب ہم تم دونوں ہی جوشیلے تھے

ایک زمانے میں جب ہم تم دونوں ہی جوشیلے تھے

اس دنیا کے سارے موسم ٹھنڈے تھے برفیلے تھے

دیکھنے والے مال و زر کیا جان لٹایا کرتے تھے

خد و خال بدن کے کتنے مہنگے تھے خرچیلے تھے

سامنے اس کے جاتے تھے تو مہر بہ لب رہ جاتے تھے

باہر سے ہم شوخ بہت تھے اندر سے شرمیلے تھے

قسمت کا یہ کھیل بھی دیکھو کھیل کی جب تک عمر رہی

کوزہ گر کے چاک سے اترے سارے کھلونے گیلے تھے

پھول سی باتیں پھول سا لہجہ پھول سے لب تھے پھول سے گال

لیکن شاخ بدن کے سارے خار بہت نوکیلے تھے

ان آنکھوں میں صحرا کی اب ریت چمکتی رہتی ہے

ان آنکھوں میں جن آنکھوں کے خواب بہت چمکیلے تھے