ezar-e-yar pe zulf-e-siyah-fam nahin

ezār-e-yār pe zulf-e-siyāh-fām nahīñ

magar ye hashr kā din hai ki jis kī shaam nahīñ

firāq-e-yār meñ dono se ham ko kaam nahīñ

havas sahar kī nahīñ ārzū-e-shām nahīñ

vilā-e-kāba-e-abrū se muñh ko kyā pherūñ

namāz ḳhatm na ho jab talak salām nahīñ

ye saif aap kī misl-e-parī-sahī-qad hai

magar ye aib hai chaltī nahīñ ḳhirām nahīñ

kaho na sarv ko ik zar-ḳharīd hī apnā

kiyā jo bande ko āzād phir ġhulām nahīñ

nahīñ i.āda-e-tā.at ko peshvā darkār

qazā namāz ko kuchh hājat-e-imām nahīñ

kisī tarah shab-e-furqat basar nahīñ hotī

kuchh is ko gardish-e-ayyām se bhī kaam nahīñ

jo us ne baat na kī ho gayā mujhe isbāt

dahan vo tañg hai gunjā.ish-e-kalām nahīñ

bujhī hai aab se kyā terī teġh-e-tez kī aañch

ki ḳhūñfishāñ mire dil kā kabāb-e-ḳhām nahīñ

phirī hai furqat-e-jānāñ meñ chashm-e-duḳhtar-e-raz

ye gardish aañkh kī saaqī hai daur-e-jām nahīñ

na dekhā naqsh qadam kā sadā-e-pā na sunī

samand-e-umr sā koī subuk ḳhirām nahīñ

barahna rahtī hai shamshīr-e-abrū-e-qātil

misāl-e-teġh-e-ajal hājat-e-niyām nahīñ

bañdheñ vo haath hinā se kiyā hai jin se shahīd

kuchh aur yaar se manzūr intiqām nahīñ

na daaġh do shab-e-furqat kā din ko naam na lo

abhī charāġh na raushan karo ki shaam nahīñ

jigar se siine se dil se guzar ga.ī dam meñ

tirī tarah tirī talvār ko qayām nahīñ

sitāra-e-falak-e-husn kahiye kam-sin hai

abhī vo chāñd kā TukḌā mah-e-tamām nahīñ

phire talab meñ jo duniyā kī vo nahīñ dīñ-dār

misāl-e-dāna jo gardish meñ hai imaam nahīñ

na ḳhatt-e-mus.haf-e-āriz kā mo'taqid ho 'vazīr'

hurūf jis meñ hoñ allāh kā kalām nahīñ

ezar-e-yar pe zulf-e-siyah-fam nahin

magar ye hashr ka din hai ki jis ki sham nahin

firaq-e-yar mein dono se hum ko kaam nahin

hawas sahar ki nahin aarzu-e-sham nahin

wila-e-kaba-e-abru se munh ko kya pherun

namaz KHatm na ho jab talak salam nahin

ye saif aap ki misl-e-pari-sahi-qad hai

magar ye aib hai chalti nahin KHiram nahin

kaho na sarw ko ek zar-KHarid hi apna

kiya jo bande ko aazad phir ghulam nahin

nahin iada-e-taat ko peshwa darkar

qaza namaz ko kuchh hajat-e-imam nahin

kisi tarah shab-e-furqat basar nahin hoti

kuchh is ko gardish-e-ayyam se bhi kaam nahin

jo us ne baat na ki ho gaya mujhe isbaat

dahan wo tang hai gunjaish-e-kalam nahin

bujhi hai aab se kya teri tegh-e-tez ki aanch

ki KHunfishan mere dil ka kabab-e-KHam nahin

phiri hai furqat-e-jaanan mein chashm-e-duKHtar-e-raz

ye gardish aankh ki saqi hai daur-e-jam nahin

na dekha naqsh qadam ka sada-e-pa na suni

samand-e-umr sa koi subuk KHiram nahin

barahna rahti hai shamshir-e-abru-e-qatil

misal-e-tegh-e-ajal hajat-e-niyam nahin

bandhen wo hath hina se kiya hai jin se shahid

kuchh aur yar se manzur intiqam nahin

na dagh do shab-e-furqat ka din ko nam na lo

abhi charagh na raushan karo ki sham nahin

jigar se sine se dil se guzar gai dam mein

teri tarah teri talwar ko qayam nahin

sitara-e-falak-e-husn kahiye kam-sin hai

abhi wo chand ka TukDa mah-e-tamam nahin

phire talab mein jo duniya ki wo nahin din-dar

misal-e-dana jo gardish mein hai imam nahin

na KHatt-e-mushaf-e-ariz ka mo'taqid ho 'wazir'

huruf jis mein hon allah ka kalam nahin