فارغ مجھے نہ جان کہ مانند صبح و مہر (ردیف .. ز)

فارغ مجھے نہ جان کہ مانند صبح و مہر

ہے داغ عشق زینت جیب کفن ہنوز

ہے ناز مفلساں زر از دست رفتہ پر

ہوں گل فروش شوخی داغ کہن ہنوز

مے خانۂ جگر میں یہاں خاک بھی نہیں

خمیازہ کھینچے ہے بت بے داد فن ہنوز

بیگانۂ وفا ہے ہوائے چمن ہنوز

وہ سبزہ سنگ پر نہ اگا کوہکن ہنوز

یارب یہ درد مند ہے کس کی نگاہ کا

ہے ربط مشک و داغ سواد ختن ہنوز

جوں جادہ سر بہ کوئے تمناۓ بے دلی

زنجیر پا ہے رشتۂ حب الوطن ہنوز

میں دور گرد قرب بساط نگاہ تھا

بیرون دل نہ تھی تپش انجمن ہنوز

میں ہوں سراب یک تپش آموختن ہنوز

زخم جگر ہے تشنۂ لب دوختن ہنوز

اے شعلہ فرصتے کہ سویدائے دل سے ہوں

کشت سپند صد جگر اندوختن ہنوز

فانوس شمع ہے کفن کشتگان شوق

در پردہ ہے معاملۂ سوختن ہنوز

مجنوں فسون شعلہ خرامی فسانہ ہے

ہے شمع جادہ داغ نیفروختن ہنوز

کو یک شرر کہ ساز چراغاں کروں اسدؔ

بزم طرب ہے پردگئے سوختن ہنوز

تھا مجھ کو خار خار جنون وفا اسدؔ

سوزن میں تھا نہفتہ گل پیرہن ہنوز