fahm-o-idrak se rutba tera baala dekha

fahm-o-idrāk se rutba tirā baalā dekhā

qāfiya tang bahut fikr-e-rasā kā dekhā

jān-o-dil hosh ḳhirad sam'-o-basar haiñ shashdar

kis ne paayā tujhe jaanā tujhe samjhā dekhā

dekhne vaale tire hosh meñ kab hote haiñ

aap hī tū ne magar apnā tamāshā dekhā

lan-tarānī to sunā saaf javāb-e-arinī

aap se jā ke bhī kuchh hazrat-e-mūsā dekhā

jalva-e-hosh-rubā ḳhuub uThāyā parda

kyā kahe dīda-e-dīdār-talab kyā dekhā

jaane kis haal meñ hai kuchh nahīñ aalam kī ḳhabar

tere dīvāne kā aalam hī nirālā dekhā

tere pardoñ hī meñ pinhān na ho nūr-e-nazar

tū ne ab tak bhī na kuchh dīda-e-bīnā dekhā

zarre zarre ko tire aks se paayā ḳhurshīd

qatre qatre ko tire faiz se dariyā dekhā

ġhunche-ġhunche meñ haiñ sar-basta rumūz-e-hikmat

dil-e-ārif kī tarah phuul bhī khiltā dekhā

Thokareñ khāte haiñ kyā kyā na ubharne vaale

miTne vāloñ hī ko is raah meñ achchhā dekhā

fahm-o-idrak se rutba tera baala dekha

qafiya tang bahut fikr-e-rasa ka dekha

jaan-o-dil hosh KHirad sam'-o-basar hain shashdar

kis ne paya tujhe jaana tujhe samjha dekha

dekhne wale tere hosh mein kab hote hain

aap hi tu ne magar apna tamasha dekha

lan-tarani to suna saf jawab-e-arini

aap se ja ke bhi kuchh hazrat-e-musa dekha

jalwa-e-hosh-ruba KHub uThaya parda

kya kahe dida-e-didar-talab kya dekha

jaane kis haal mein hai kuchh nahin aalam ki KHabar

tere diwane ka aalam hi nirala dekha

tere pardon hi mein pinhan na ho nur-e-nazar

tu ne ab tak bhi na kuchh dida-e-bina dekha

zarre zarre ko tere aks se paya KHurshid

qatre qatre ko tere faiz se dariya dekha

ghunche-ghunche mein hain sar-basta rumuz-e-hikmat

dil-e-arif ki tarah phul bhi khilta dekha

Thokaren khate hain kya kya na ubharne wale

miTne walon hi ko is rah mein achchha dekha