faiz-e-dil se mutrib-e-kaamil hua jata hun main

faiz-e-dil se mutrib-e-kāmil huā jaatā huuñ maiñ

bā.is-e-rañgīnī-e-mahfil huā jaatā huuñ maiñ

kis liye ye shikva-e-mahrūmī-e-kaif-o-nishāt

ḳhūgar-e-ālām ḳhud ai dil huā jaatā huuñ maiñ

is qadar maḳhmūr huuñ terī nigāh-e-mast se

chaah meñ manzil kī ḳhud manzil huā jaatā huuñ maiñ

bahr-e-hastī meñ mazā dene lage tūfāñ bhī ab

ai nadīm āsūda-e-sāhil huā jaatā huuñ maiñ

be-sadā se ho ga.e ham-sāz sab tār-e-nafas

uf shikasta sā rabāb-e-dil huā jaatā huuñ maiñ

ahl-e-fan ahl-e-hunar dil khol kar dete haiñ daad

māhir-e-fan shā.ir-e-kāmil huā jaatā huuñ maiñ

ai 'jamāl' aapas meñ kyā aql-o-junūñ kā rabt hai

jām-e-vahshat pī ke bhī aaqil huā jaatā huuñ maiñ

faiz-e-dil se mutrib-e-kaamil hua jata hun main

bais-e-rangini-e-mahfil hua jata hun main

kis liye ye shikwa-e-mahrumi-e-kaif-o-nishat

KHugar-e-alam KHud ai dil hua jata hun main

is qadar maKHmur hun teri nigah-e-mast se

chah mein manzil ki KHud manzil hua jata hun main

bahr-e-hasti mein maza dene lage tufan bhi ab

ai nadim aasuda-e-sahil hua jata hun main

be-sada se ho gae ham-saz sab tar-e-nafas

uf shikasta sa rabab-e-dil hua jata hun main

ahl-e-fan ahl-e-hunar dil khol kar dete hain dad

mahir-e-fan shair-e-kaamil hua jata hun main

ai 'jamal' aapas mein kya aql-o-junun ka rabt hai

jam-e-wahshat pi ke bhi aaqil hua jata hun main