falak karne ke qabil aasman hai

falak karne ke qābil āsmāñ hai

ki ye pīrāna-sar jāhil javāñ hai

ga.e un qāfiloñ se bhī uThī gard

hamārī ḳhaak kyā jāneñ kahāñ hai

bahut nā-mehrbāñ rahtā hai yaanī

hamāre haal par kuchh mehrbāñ hai

hameñ jis jaa.e kal ġhash aa gayā thā

vahīñ shāyad ki us kā āstāñ hai

mizha har ik hai us kī tez nāvak

ḳhamīda bhauñ jo hai zorīñ kamāñ hai

use jab tak hai tīr-andāzī kā shauq

zabūnī par mirī ḳhātir nishāñ hai

chalī jaatī hai dhaḌkoñ hī meñ jaañ bhī

yahīñ se kahte haiñ jaañ ko ravāñ hai

usī kā dam bharā karte raheñge

badan meñ apne jab tak nīm-jāñ hai

paḌā hai phuul ghar meñ kaahe ko 'mīr'

jhamak hai gul kī barq-e-āshiyāñ hai

falak karne ke qabil aasman hai

ki ye pirana-sar jahil jawan hai

gae un qafilon se bhi uThi gard

hamari KHak kya jaanen kahan hai

bahut na-mehrban rahta hai yani

hamare haal par kuchh mehrban hai

hamein jis jae kal ghash aa gaya tha

wahin shayad ki us ka aastan hai

mizha har ek hai us ki tez nawak

KHamida bhaun jo hai zorin kaman hai

use jab tak hai tir-andazi ka shauq

zabuni par meri KHatir nishan hai

chali jati hai dhaDkon hi mein jaan bhi

yahin se kahte hain jaan ko rawan hai

usi ka dam bhara karte rahenge

badan mein apne jab tak nim-jaan hai

paDa hai phul ghar mein kahe ko 'mir'

jhamak hai gul ki barq-e-ashiyan hai