falak se chand sitaron se jam lena hai

falak se chāñd sitāroñ se jaam lenā hai

mujhe sahar se na.ī ek shaam lenā hai

kise ḳhabar ki farishte ġhazal samajhte haiñ

ḳhudā ke sāmne kāfir kā naam lenā hai

muāmla hai tirā badtarīn dushman se

mire aziiz mohabbat se kaam lenā hai

mahaktī zulfoñ se ḳhushbū chamaktī aañkh se dhuup

shaboñ se jām-e-sahar kā salām lenā hai

tumhārī chaal kī āhistagī ke lahje meñ

suḳhan se dil ko masalne kā kaam lenā hai

nahīñ maiñ 'mīr' ke dar par kabhī nahīñ jaatā

mujhe ḳhudā se ġhazal kā kalām lenā hai

baḌe salīqe se noToñ meñ us ko tulvā kar

amīr-e-shahr se ab intiqām lenā hai

falak se chand sitaron se jam lena hai

mujhe sahar se nai ek sham lena hai

kise KHabar ki farishte ghazal samajhte hain

KHuda ke samne kafir ka nam lena hai

muamla hai tera badtarin dushman se

mere aziz mohabbat se kaam lena hai

mahakti zulfon se KHushbu chamakti aankh se dhup

shabon se jam-e-sahar ka salam lena hai

tumhaari chaal ki aahistagi ke lahje mein

suKHan se dil ko masalne ka kaam lena hai

nahin main 'mir' ke dar par kabhi nahin jata

mujhe KHuda se ghazal ka kalam lena hai

baDe saliqe se noTon mein us ko tulwa kar

amir-e-shahr se ab intiqam lena hai