fana kahte hain kis ko maut se pahle hi mar jaana

fanā kahte haiñ kis ko maut se pahle hī mar jaanā

baqā hai naam kis kā apnī hastī se guzar jaanā

jo rokā raah meñ hur ne to shah abbās se bole

mire bhaa.ī na ġhusse meñ kahīñ had se guzar jaanā

kahā ahl-e-haram ne roke yuuñ akbar ke lāshe par

javāñ hone kā shāyad tum ne rakkhā naam mar jaanā

baqā meñ thā fanā kā martaba hāsil shahīdoñ ko

vahāñ is par amal thā maut se pahle hī mar jaanā

na lete kaam gar sibt-e-nabī sabr-o-tahammul se

la.īnoñ kā nigāh-e-ḳhashm se āsāñ thā mar jaanā

dikhā.ī jañg meñ sūrat udhar jā pahuñche vo kausar

ye asġhar hī kī thī raftār idhar aanā udhar jaanā

yahāñ kā zinda rahnā maut se bad-tar samajhtā huuñ

hayāt-e-jāvidāñ hai karbalā meñ jā ke mar jaanā

fana kahte hain kis ko maut se pahle hi mar jaana

baqa hai nam kis ka apni hasti se guzar jaana

jo roka rah mein hur ne to shah abbas se bole

mere bhai na ghusse mein kahin had se guzar jaana

kaha ahl-e-haram ne roke yun akbar ke lashe par

jawan hone ka shayad tum ne rakkha nam mar jaana

baqa mein tha fana ka martaba hasil shahidon ko

wahan is par amal tha maut se pahle hi mar jaana

na lete kaam gar sibt-e-nabi sabr-o-tahammul se

lainon ka nigah-e-KHashm se aasan tha mar jaana

dikhai jang mein surat udhar ja pahunche wo kausar

ye asghar hi ki thi raftar idhar aana udhar jaana

yahan ka zinda rahna maut se bad-tar samajhta hun

hayat-e-jawidan hai karbala mein ja ke mar jaana