fana karun tan-e-KHaki baqa-e-jaan ke liye

fanā karūñ tan-e-ḳhākī baqā-e-jāñ ke liye

ajal naved hai ārām-e-jāvedāñ ke liye

zabāñ kī fikr nahīñ sharh-e-dāstāñ ke liye

nigāh-e-shauq hai betāb ḳhud bayāñ ke liye

idhar farāhamī-e-ḳhas meñ huuñ maiñ sargardāñ

taḌap rahī hai udhar barq āshiyāñ ke liye

hai chashm-e-shauq meñ apnī to āstāñ koī aur

jhuke hazār ye sar sajda-e-butāñ ke liye

baras rahī hai vahāñ āshiyāñ pe vīrānī

phaḌak rahī hai yahāñ ruuh āshiyāñ ke liye

umīd-o-yās ke jhagḌe se dil huā āzād

ḳhudī miTā ke maze aish-e-jāvedāñ ke liye

kahīñ hai barq hai sarsar kahīñ kahīñ sayyād

hazār ḳhatre haiñ kambaḳht ik āshiyāñ ke liye

khuleñge par to do aalam na hoñge phir kaafī

fazā-e-quds hai darkār murġh-e-jāñ ke liye

bahār ḳhatm huī ab chaman ko kyā dekhūñ

ki aañkh hī nahīñ nazzāra-e-ḳhizāñ ke liye

qafas ke sāmne tinke hī rakh de o sayyād

nigāh-e-shauq tarastī hai āshiyāñ ke liye

chaḌhā diyā mire sayyād ne qafas pe ġhilāf

taḌap ke rah ga.e ham sair-e-bostāñ ke liye

bahā firāq meñ ai dil yahāñ talak aañsū

rahe na buuñd koī chashm-e-ḳhūñ-fishāñ ke liye

kahāñ ye kunj-e-qafas aur chaman kī sair kahāñ

phaḌak phaḌak ke hai marnā ab āshiyāñ ke liye

biThā diyā mujhe vāmāñdgī ne kāñToñ meñ

zamīñ pe sar ko paTaktā huuñ kārvāñ ke liye

maiñ saumi'a se jo niklā to mai-kade ko chalā

matā.a-e-zohd liye hadiya-e-muġhāñ ke liye

muñh apnā pher ke bulbul pe barq hañstī hai

ġharīb chuntī hai tinke jo āshiyāñ ke liye

misāl-e-qatra fanā bahr-e-ishq meñ ho jā

agar taḌap hai 'valī' umr-e-jāvedāñ ke liye

fana karun tan-e-KHaki baqa-e-jaan ke liye

ajal nawed hai aaram-e-jawedan ke liye

zaban ki fikr nahin sharh-e-dastan ke liye

nigah-e-shauq hai betab KHud bayan ke liye

idhar farahami-e-KHas mein hun main sargardan

taDap rahi hai udhar barq aashiyan ke liye

hai chashm-e-shauq mein apni to aastan koi aur

jhuke hazar ye sar sajda-e-butan ke liye

baras rahi hai wahan aashiyan pe virani

phaDak rahi hai yahan ruh aashiyan ke liye

umid-o-yas ke jhagDe se dil hua aazad

KHudi miTa ke maze aish-e-jawedan ke liye

kahin hai barq hai sarsar kahin kahin sayyaad

hazar KHatre hain kambaKHt ek aashiyan ke liye

khulenge par to do aalam na honge phir kafi

faza-e-quds hai darkar murgh-e-jaan ke liye

bahaar KHatm hui ab chaman ko kya dekhun

ki aankh hi nahin nazzara-e-KHizan ke liye

qafas ke samne tinke hi rakh de o sayyaad

nigah-e-shauq tarasti hai aashiyan ke liye

chaDha diya mere sayyaad ne qafas pe ghilaf

taDap ke rah gae hum sair-e-bostan ke liye

baha firaq mein ai dil yahan talak aansu

rahe na bund koi chashm-e-KHun-fishan ke liye

kahan ye kunj-e-qafas aur chaman ki sair kahan

phaDak phaDak ke hai marna ab aashiyan ke liye

biTha diya mujhe wamandgi ne kanTon mein

zamin pe sar ko paTakta hun karwan ke liye

main saumi'a se jo nikla to mai-kade ko chala

mataa-e-zohd liye hadiya-e-mughan ke liye

munh apna pher ke bulbul pe barq hansti hai

gharib chunti hai tinke jo aashiyan ke liye

misal-e-qatra fana bahr-e-ishq mein ho ja

agar taDap hai 'wali' umr-e-jawedan ke liye