faqat shor-e-dil-e-pur-arzu tha

faqat shor-e-dil-e-pur-ārzū thā

na apne jism meñ ham the na tū thā

har ik ke paañv par jhukte kaTī umr

na samjhe ham ki kis qālib meñ tū thā

jahāñ pahuñche usī kā nuur paayā

jidhar dekhā vahī ḳhurshīd-rū thā

jagah dāman meñ apne kyuuñ na dete

ki tifl-e-ashk apnā hī lahū thā

kahūñ kyā dil kī maiñ nāzuk-mizājī

ḳhudā baḳhshe nihāyat tund-ḳhū thā

maiñ kaifiyyat kahūñ kyā bazm-e-mai kī

ki miinā haath meñ āñkhoñ meñ tū thā

ġhash aayā us ne taulī teġh jab jab

ajab halkā hamārā bhī lahū thā

bahut DhūñDā kahīñ paayā na ham ne

batā de ye ki kis goshe meñ tū thā

bachā qātil kā dāman lillāhil-hamd

bahut khaulā huā apnā lahū thā

udū the sāqiyā sab mai-kade meñ

yahī ik aas thī palle pe tū thā

libās-e-kuhna jab thā apnā sad-chāk

to phir bekār paivand o rafū thā

ġhazab meñ aa ke tujh ko toḌtā shaiḳh

natīja bahas kā kyā ai subū thā

tirī tasvīr the ham bhī kisī vaqt

yahī naqshā hamārā hū-ba-hū thā

nazar meñ hech thā kaunain saaqī

labālab jaam thā ham the subū thā

sazā laġhzish kī paate bazm meñ ham

ḳhudā ko ḳhair karnā thā ki tū thā

ham apne hosh meñ baaqī the har tarah

magar jab tū hamāre rū-ba-rū thā

tujhī se muñh phulā lete ajab kyā

sabā ġhunchoñ kā bhī āḳhir numū thā

chale ham baaġh se ai 'shād' kis vaqt

bahār aane ko thī gul kā numū thā

faqat shor-e-dil-e-pur-arzu tha

na apne jism mein hum the na tu tha

har ek ke panw par jhukte kaTi umr

na samjhe hum ki kis qalib mein tu tha

jahan pahunche usi ka nur paya

jidhar dekha wahi KHurshid-ru tha

jagah daman mein apne kyun na dete

ki tifl-e-ashk apna hi lahu tha

kahun kya dil ki main nazuk-mizaji

KHuda baKHshe nihayat tund-KHu tha

main kaifiyyat kahun kya bazm-e-mai ki

ki mina hath mein aankhon mein tu tha

ghash aaya us ne tauli tegh jab jab

ajab halka hamara bhi lahu tha

bahut DhunDa kahin paya na hum ne

bata de ye ki kis goshe mein tu tha

bacha qatil ka daman lillahil-hamd

bahut khaula hua apna lahu tha

udu the saqiya sab mai-kade mein

yahi ek aas thi palle pe tu tha

libas-e-kuhna jab tha apna sad-chaak

to phir bekar paiwand o rafu tha

ghazab mein aa ke tujh ko toDta shaiKH

natija bahas ka kya ai subu tha

teri taswir the hum bhi kisi waqt

yahi naqsha hamara hu-ba-hu tha

nazar mein hech tha kaunain saqi

labaalab jam tha hum the subu tha

saza laghzish ki pate bazm mein hum

KHuda ko KHair karna tha ki tu tha

hum apne hosh mein baqi the har tarah

magar jab tu hamare ru-ba-ru tha

tujhi se munh phula lete ajab kya

saba ghunchon ka bhi aaKHir numu tha

chale hum bagh se ai 'shad' kis waqt

bahaar aane ko thi gul ka numu tha