faqat zamin se rishte ko ustuwar kiya

faqat zamīn se rishte ko ustuvār kiyā

phir us ke baad safar sab sitāra-vār kiyā

bas itnī der meñ ādād ho ga.e tabdīl

ki jitnī der meñ ham ne unheñ shumār kiyā

kabhī kabhī lagī aisī zamīn kī hālat

ki jaise us ko zamāne ne sañgsār kiyā

jahān-e-kohna azal se thā yuuñ to gard-ālūd

kuchh ham ne ḳhaak uḌā kar yahāñ ġhubār kiyā

bashar bigāḌegā māhaul vo jo us ke liye

na jaane kitne zamānoñ ne sāzgār kiyā

tamām vahm o gumāñ hai to ham bhī dhoka haiñ

isī ḳhayāl se duniyā ko maiñ ne pyaar kiyā

na saañs le sakā gahrā.iyoñ meñ jab vo 'malāl'

to us ko apne jazīre se ham-kanār kiyā

faqat zamin se rishte ko ustuwar kiya

phir us ke baad safar sab sitara-war kiya

bas itni der mein aadad ho gae tabdil

ki jitni der mein hum ne unhen shumar kiya

kabhi kabhi lagi aisi zamin ki haalat

ki jaise us ko zamane ne sangsar kiya

jahan-e-kohna azal se tha yun to gard-alud

kuchh hum ne KHak uDa kar yahan ghubar kiya

bashar bigaDega mahaul wo jo us ke liye

na jaane kitne zamanon ne sazgar kiya

tamam wahm o guman hai to hum bhi dhoka hain

isi KHayal se duniya ko main ne pyar kiya

na sans le saka gahraiyon mein jab wo 'malal'

to us ko apne jazire se ham-kanar kiya