farar KHud se mujhe dam-ba-dam jahan ki tarah

farār ḳhud se mujhe dam-ba-dam jahāñ kī tarah

muhīt mujh pe mirī zaat āsmāñ kī tarah

nigār-ḳhāna-e-dil meñ hunūt kar le mujhe

ki reg-e-vaqt pe huuñ maiñ tire nishāñ kī tarah

maiñ apne ḳhol meñ mahbūs misl-e-kirm-o-harīr

maiñ apnī qabr banātā rahā makāñ kī tarah

na tum se dard kā shikva na tum se shukr-e-karam

ki ḳhair-o-shar se ho tum māvarā zamāñ kī tarah

qadam qadam vo mire saath aur maiñ tanhā

mile haiñ dost mire mujh se āsmāñ kī tarah

agar gila hai to hai ḳhud se bevafā.ī kā

ki lahza lahza digar-gūñ huuñ maiñ jahāñ kī tarah

mire zamīr meñ āsūda vaqt ke tūfāñ

vasī.a zarf mirā bahr-e-be-karāñ kī tarah

farar KHud se mujhe dam-ba-dam jahan ki tarah

muhit mujh pe meri zat aasman ki tarah

nigar-KHana-e-dil mein hunut kar le mujhe

ki reg-e-waqt pe hun main tere nishan ki tarah

main apne KHol mein mahbus misl-e-kirm-o-harir

main apni qabr banata raha makan ki tarah

na tum se dard ka shikwa na tum se shukr-e-karam

ki KHair-o-shar se ho tum mawara zaman ki tarah

qadam qadam wo mere sath aur main tanha

mile hain dost mere mujh se aasman ki tarah

agar gila hai to hai KHud se bewafai ka

ki lahza lahza digar-gun hun main jahan ki tarah

mere zamir mein aasuda waqt ke tufan

wasia zarf mera bahr-e-be-karan ki tarah