farsh-e-maqtal ko sajao chah se arman se

farsh-e-maqtal ko sajāo chaah se armān se

raqs karne aa.e haiñ ham ik na.e unvān se

dil hai raushan zindagī ke ik na.e irfān se

apnā rishta kaT chukā hai kufr se īmān se

tang-dāmānī se apnī sharm aa.e ḳhud hameñ

dard kā rishta jo toḌeñ ham kisī insān se

maut hai kamzor kī arzāñ hamesha kī tarah

qahrmānī hai vahī go dūsre unvān se

ḳhuun kī har buuñd māñge ḳhūñ-bahā maqtal meñ aaj

kaam ab bantā nahīñ hai va.ada-o-paimān se

jagmagāte dekh le phir hurriyat ke bām-o-dar

baad mere ye rahe the kuchh dinoñ vīrān se

amn ho insāf ho aur ho mohabbat kī fazā

ek duniyā ham banā.eñ ik na.e unvān se

āb-o-gil se dīda-e-bedār paidā kar diyā

ham bhī chhūTe zindagī ke ik baḌe ehsān se

raqs-e-majnūñ tesha-e-farhād se ābād the

dasht-o-sahrā ab to lagte haiñ baḌe sunsān se

jin ke hāthoñ shahr saarā aag kā tūfān hai

bazm meñ baiThe haiñ kaise vo bane anjān se

farsh-e-maqtal ko sajao chah se arman se

raqs karne aae hain hum ek nae unwan se

dil hai raushan zindagi ke ek nae irfan se

apna rishta kaT chuka hai kufr se iman se

tang-damani se apni sharm aae KHud hamein

dard ka rishta jo toDen hum kisi insan se

maut hai kamzor ki arzan hamesha ki tarah

qahrmani hai wahi go dusre unwan se

KHun ki har bund mange KHun-baha maqtal mein aaj

kaam ab banta nahin hai wada-o-paiman se

jagmagate dekh le phir hurriyat ke baam-o-dar

baad mere ye rahe the kuchh dinon viran se

amn ho insaf ho aur ho mohabbat ki faza

ek duniya hum banaen ek nae unwan se

aab-o-gil se dida-e-bedar paida kar diya

hum bhi chhuTe zindagi ke ek baDe ehsan se

raqs-e-majnun tesha-e-farhad se aabaad the

dasht-o-sahra ab to lagte hain baDe sunsan se

jin ke hathon shahr sara aag ka tufan hai

bazm mein baiThe hain kaise wo bane anjaan se