fasil-e-dard ko main mismar karne wali hun

fasīl-e-dard ko mismār karne vaalī huuñ

maiñ āñsuoñ kī nadī paar karne vaalī huuñ

mujhe ḳhudā kī razā se hai vāsta har dam

maiñ ḳhud-numā.ī se inkār karne vaalī huuñ

ye us kī marzī ki iqrār vo kare na kare

maiñ aaj ḳhvāhish-e-iz.hār karne vaalī huuñ

vo jis ne kī hai hamesha muḳhālifat merī

usī ko apnā madad-gār karne vaalī huuñ

vafā kī raah meñ ḳhud ko tabāh kar ke maiñ

tamām shahr ko bedār karne vaalī huuñ

koī na Daale nigāh-e-ġhalat ki maiñ apne

nihatte hāthoñ ko talvār karne vaalī huuñ

fasil-e-dard ko mismar karne wali hun

main aansuon ki nadi par karne wali hun

mujhe KHuda ki raza se hai wasta har dam

main KHud-numai se inkar karne wali hun

ye us ki marzi ki iqrar wo kare na kare

main aaj KHwahish-e-izhaar karne wali hun

wo jis ne ki hai hamesha muKHalifat meri

usi ko apna madad-gar karne wali hun

wafa ki rah mein KHud ko tabah kar ke main

tamam shahr ko bedar karne wali hun

koi na Dale nigah-e-ghalat ki main apne

nihatte hathon ko talwar karne wali hun