fasil-e-jaan pe rakkhi thi na baam-o-dar pe rakkhi thi

fasīl-e-jāñ pe rakkhī thī na bām-o-dar pe rakkhī thī

zamāne bhar kī be-ḳhvābī mire bistar pe rakkhī thī

ubhar aa.ī thī peshānī pe naqsh-e-mo'tabar ban kar

purānī fikr kī ḳhushbū na.e manzar pe rakkhī thī

nazar uTThī to bas hairat se ham dekhā kiye us ko

hamārī gum-shuda dastār us ke sar pe rakkhī thī

usī ko zaḳhm dene par tulā thā sar-phirā sūraj

mirī taḳh.īl kī buniyād jis shahpar pe rakkhī thī

zamīñ par raushnī aatī rahī jaatī rahī lekin

hamārī ḳhāna-vīrānī bas ik mehvar pe rakkhī thī

pasīna merī mehnat kā mire māthe pe raushan thā

chamak la.al-o-javāhar kī mirī Thokar pe rakkhī thī

mire sar par musalsal aag barsātā rahā sūraj

na jaane kaisī ThanDak merī chashm-e-tar pe rakkhī thī

mirī gardan jo zīnat ban chukī thī qatl-gāhoñ kī

kabhī neze pe rakkhī thī kabhī ḳhanjar pe rakkhī thī

badal kar pairahan qadmoñ ke nīche aa ga.ī 'nāzir'

vahī miTTī jo ik din dast-e-kūza-gar pe rakkhī thī

fasil-e-jaan pe rakkhi thi na baam-o-dar pe rakkhi thi

zamane bhar ki be-KHwabi mere bistar pe rakkhi thi

ubhar aai thi peshani pe naqsh-e-mo'tabar ban kar

purani fikr ki KHushbu nae manzar pe rakkhi thi

nazar uTThi to bas hairat se hum dekha kiye us ko

hamari gum-shuda dastar us ke sar pe rakkhi thi

usi ko zaKHm dene par tula tha sar-phira suraj

meri taKHil ki buniyaad jis shahpar pe rakkhi thi

zamin par raushni aati rahi jati rahi lekin

hamari KHana-virani bas ek mehwar pe rakkhi thi

pasina meri mehnat ka mere mathe pe raushan tha

chamak lal-o-jawahar ki meri Thokar pe rakkhi thi

mere sar par musalsal aag barsata raha suraj

na jaane kaisi ThanDak meri chashm-e-tar pe rakkhi thi

meri gardan jo zinat ban chuki thi qatl-gahon ki

kabhi neze pe rakkhi thi kabhi KHanjar pe rakkhi thi

badal kar pairahan qadmon ke niche aa gai 'nazir'

wahi miTTi jo ek din dast-e-kuza-gar pe rakkhi thi