fasil-e-jism pe shab-KHun shararten teri

fasīl-e-jism pe shab-ḳhūñ sharārteñ terī

zarā sī bhī nahīñ badlī haiñ ādateñ terī

ye zaḳhm zaḳhm badan aur lahū lahū ye ḳhvāb

kitāb-e-jism pe utrī haiñ āyateñ terī

hisār-e-ātish-e-namrūd meñ ghirā huuñ maiñ

ab itnī sust qadam kyuuñ haiñ rahmateñ terī

charāg chāñd shafaq shaam phuul jhiil sabā

churā.īñ sab ne hī kuchh kuchh shabāhateñ terī

ye mauj mauj lahū meñ tire badan kā nasha

talāsh kartā hai har lamha qurbateñ terī

ai rashk-e-sarv-o-sanobar-qadāñ ḳhirām-e-nāz

ki raah dekh rahī haiñ qayāmateñ terī

mirī havas ke samundar meñ madd-o-jazr nahīñ

p.e-zavāl na hoñ chāñd-chāhateñ terī

ukhaḌne vaalī thī jis dam tanāb sāñsoñ kī

dar aa.iiñ ḳhema-e-dil meñ bashārateñ terī

ise sambhāl, huā jā rahā hai zer-o-zabar

ki dil pe laa.ī huī sab haiñ āfateñ terī

adā huā na kabhī mujh se ek sajda-e-shukr

maiñ kis zabāñ se karūñgā shikāyateñ terī

vo āñkhoñ āñkhoñ meñ rātoñ kā kāTnā terā

vo bātoñ bātoñ meñ 'anjum' ibādateñ terī

fasil-e-jism pe shab-KHun shararten teri

zara si bhi nahin badli hain aadaten teri

ye zaKHm zaKHm badan aur lahu lahu ye KHwab

kitab-e-jism pe utri hain aayaten teri

hisar-e-atish-e-namrud mein ghira hun main

ab itni sust qadam kyun hain rahmaten teri

charag chand shafaq sham phul jhil saba

churain sab ne hi kuchh kuchh shabahaten teri

ye mauj mauj lahu mein tere badan ka nasha

talash karta hai har lamha qurbaten teri

ai rashk-e-sarw-o-sanobar-qadan KHiram-e-naz

ki rah dekh rahi hain qayamaten teri

meri hawas ke samundar mein madd-o-jazr nahin

pe-zawal na hon chand-chahaten teri

ukhaDne wali thi jis dam tanab sanson ki

dar aain KHema-e-dil mein bashaaraten teri

ise sambhaal, hua ja raha hai zer-o-zabar

ki dil pe lai hui sab hain aafaten teri

ada hua na kabhi mujh se ek sajda-e-shukr

main kis zaban se karunga shikayaten teri

wo aankhon aankhon mein raaton ka kaTna tera

wo baaton baaton mein 'anjum' ibaadaten teri