fasil-e-reg par itna bharosa kar liya tumne

fasīl-e-reg par itnā bharosa kar liyā tum ne

chhateñ bhī Daal diiñ aur vā darīcha kar liyā tum ne

ta.ajjub hai ibādat meñ bhī aisā kar liyā tum ne

nahīñ dil ko jhukāyā aur sajda kar liyā tum ne

kabhī maanā sharī.at kī kabhī is se rahe aajiz

magar da.avā ki dil allāh vaalā kar liyā tum ne

mohabbat pyaar hamdardī sabhī ko rakh diyā girvī

husūl-e-aish kī ḳhātir jo chāhā kar liyā tum ne

sameTā zindagī bhar kaalī gorī jeb kī raunaq

Dhalā jab umr kā sūraj to tauba kar liyā tum ne

tahārat kī tamannā hai na dil meñ haq-pasandī hai

magar ma.asūm chehra aur labāda kar liyā tum ne

garāñ-māya amānat thī use mahfūz rakhnā thā

'valī' pākīza tahzīboñ kā saudā kar liyā tum ne

fasil-e-reg par itna bharosa kar liya tum ne

chhaten bhi Dal din aur wa daricha kar liya tum ne

tajjub hai ibaadat mein bhi aisa kar liya tum ne

nahin dil ko jhukaya aur sajda kar liya tum ne

kabhi mana shariat ki kabhi is se rahe aajiz

magar dawa ki dil allah wala kar liya tum ne

mohabbat pyar hamdardi sabhi ko rakh diya girwi

husul-e-aish ki KHatir jo chaha kar liya tum ne

sameTa zindagi bhar kali gori jeb ki raunaq

Dhala jab umr ka suraj to tauba kar liya tum ne

tahaarat ki tamanna hai na dil mein haq-pasandi hai

magar masum chehra aur labaada kar liya tum ne

garan-maya amanat thi use mahfuz rakhna tha

'wali' pakiza tahzibon ka sauda kar liya tum ne