fasl aisi hai ulfat ke daman tale

fasl aisī hai ulfat ke dāman tale

ham jaleñ tum jalo saarī duniyā jale

tap ke kundan kī mānind nikhrā junūñ

jis qadar ġham baḌhā baḌh ga.e hausle

dil meñ phailī hai yuuñ raushnī yaad kī

jaise vīrān mandir meñ dīpak jale

jashn se merī barbādiyoñ kā chalo

dosto aao shīshe meñ sho.ala Dhale

har-nafas jaise jiine kī ta.azīr hai

kitne dushvār haiñ umr ke marhale

ham ulajhte rahe falsafī kī tarah

aur baḌhte ga.e vaqt ke mas.ale

moḌ sakte haiñ duniyā kā ruḳh aaj hī

aap se kuchh hasīñ ham se kuchh manchale

vaqt mujh se mirā hāfiza chhīn le

aag meñ koī yādoñ kī kab tak chale

ḳhanda-e-gul se 'sāhir' na bahleñge ham

tāza-dam meñ junūñ ke abhī valvale

fasl aisi hai ulfat ke daman tale

hum jalen tum jalo sari duniya jale

tap ke kundan ki manind nikhra junun

jis qadar gham baDha baDh gae hausle

dil mein phaili hai yun raushni yaad ki

jaise viran mandir mein dipak jale

jashn se meri barbaadiyon ka chalo

dosto aao shishe mein shoala Dhale

har-nafas jaise jine ki tazir hai

kitne dushwar hain umr ke marhale

hum ulajhte rahe falsafi ki tarah

aur baDhte gae waqt ke masale

moD sakte hain duniya ka ruKH aaj hi

aap se kuchh hasin hum se kuchh manchale

waqt mujh se mera hafiza chhin le

aag mein koi yaadon ki kab tak chale

KHanda-e-gul se 'sahir' na bahlenge hum

taza-dam mein junun ke abhi walwale