dhaDakte sans lete rukte chalte maine dekha hai

dhaḌakte saañs lete rukte chalte maiñ ne dekhā hai

koī to hai jise apne meñ palte maiñ ne dekhā hai

tumhāre ḳhuun se merī ragoñ meñ ḳhvāb raushan hai

tumhārī ādatoñ meñ ḳhud ko Dhalte maiñ ne dekhā hai

na jaane kaun hai jo ḳhvāb meñ āvāz detā hai

ḳhud apne-āp ko nīñdoñ meñ chalte maiñ ne dekhā hai

merī ḳhāmoshiyoñ meñ tairtī haiñ terī āvāzeñ

tire siine meñ apnā dil machalte maiñ ne dekhā hai

badal jā.egā sab kuchh bādaloñ se dhuup chaTḳhegī

bujhī āñkhoñ meñ koī ḳhvāb jalte maiñ ne dekhā hai

mujhe mālūm hai un kī duā.eñ saath chaltī haiñ

safar kī mushkiloñ ko haath malte maiñ ne dekhā hai

dhaDakte sans lete rukte chalte main ne dekha hai

koi to hai jise apne mein palte main ne dekha hai

tumhaare KHun se meri ragon mein KHwab raushan hai

tumhaari aadaton mein KHud ko Dhalte main ne dekha hai

na jaane kaun hai jo KHwab mein aawaz deta hai

KHud apne-ap ko nindon mein chalte main ne dekha hai

meri KHamoshiyon mein tairti hain teri aawazen

tere sine mein apna dil machalte main ne dekha hai

badal jaega sab kuchh baadalon se dhup chaTKHegi

bujhi aankhon mein koi KHwab jalte main ne dekha hai

mujhe malum hai un ki duaen sath chalti hain

safar ki mushkilon ko hath malte main ne dekha hai