faza-e-admiyyat ko sanwarne hi nahin dete

fazā-e-ādmiyyat ko sañvarne hī nahīñ dete

siyāsat-dāñ diloñ ke zaḳhm bharne hī nahīñ dete

zamāna vo bhī thā jab hādse kā Dar satātā thā

magar ab hādse logoñ ko Darne hī nahīñ dete

kuchh aise ḳhvāb ham ne paal rakkhe haiñ ki jo ham ko

haqīqat kī zamīñ par paañv dharne hī nahīñ dete

ye maanā 'ishq se bantī hai jannat zindagī lekin

masā.il zindagī ke 'ishq karne hī nahīñ dete

guzargāhoñ ke aage manzileñ āvāz detī haiñ

magar Thahre hue lamhe guzarne hī nahīñ dete

'bashar' be-rahm haiñ ye parbatoñ jaise usuul apne

kisī ke dil kī vaadī meñ utarne hī nahīñ dete

faza-e-admiyyat ko sanwarne hi nahin dete

siyasat-dan dilon ke zaKHm bharne hi nahin dete

zamana wo bhi tha jab hadse ka Dar satata tha

magar ab hadse logon ko Darne hi nahin dete

kuchh aise KHwab hum ne pal rakkhe hain ki jo hum ko

haqiqat ki zamin par panw dharne hi nahin dete

ye mana 'ishq se banti hai jannat zindagi lekin

masail zindagi ke 'ishq karne hi nahin dete

guzargahon ke aage manzilen aawaz deti hain

magar Thahre hue lamhe guzarne hi nahin dete

'bashar' be-rahm hain ye parbaton jaise usul apne

kisi ke dil ki wadi mein utarne hi nahin dete